மரணக்குழியாக மாறிய மணல் திட்டு: கான்கிரீட் கல் சரிந்து விழுந்ததில் சிறுவன் மரணம்

பாசீர் பூத்தே: 

நேற்று இங்குள்ள செமேராக், கம்போங் தெலாகா பப்பானில் உள்ள தனது வீட்டின் முன் விளையாடிக் கொண்டிருந்த போது, ஒரு கான்கிரீட் தொகுதியில் சிக்கியதில், 12 வயது சிறுவன் உயிரிழந்ததாக ஹரியான் மெட்ரோ செய்தி நிறுவனம் தெரிவித்துள்ளது.

மதியம் 2.30 மணியளவில் நிகழ்ந்த சம்பவத்தில், முஹம்மத் யூசோஃப் நோர் இஸ்மாயில், 12 வயதான தனது மாமா முஹம்மத் யூனுஸ் நசீருடன், கான்கிரீட் தொகுதிகளுக்கு அருகிலுள்ள ஒரு மணல் அகழ்வுப் பகுதியில் விளையாடிக் கொண்டிருந்ததாக நம்பப்படுகிறது.

இரண்டு குழந்தைகளும் ஒரு மணல் குழியில் விழுந்து, ஒரு கான்கிரீட் தொகுதியின் கீழ் சிக்கியிருப்பது கண்டுபிடிக்கப்பட்டதைத் தொடர்ந்து, ஒரு குடும்ப உறுப்பினர் மற்றவர்களுக்குத் தெரிவித்ததாக பாசீர் பூத்தே மாவட்ட போலிஸ் தலைவர் சூப்பிரண்டெண்டன் ஸாரி யாகூப் கூறியுள்ளார்.

"பாதிக்கப்பட்டவர் சுயநினைவின்றி கண்டுபிடிக்கப்பட்டார். குடும்பத்தினர் செராங் ருக்கு சுகாதார கிளினிக்கைத் தொடர்பு கொண்டனர். பின்னர், ஒரு சுகாதார உதவியாளர் குழந்தை இறந்துவிட்டதை உறுதிப்படுத்தினார்" என்று தொடர்பு கொள்ளப்பட்ட போது, அவர் ஹரியான் மெட்ரோவிடம் கூறினார்.

மற்றொரு குழந்தை கழுத்துப் பகுதியில் காயமடைந்ததாகவும், சிகிச்சைக்காக துங்கு அனிஸ் மருத்துவமனைக்கு அனுப்பி வைக்கப்பட்டதாகவும் ஸாரி மேலும் கூறினார்.

இதற்கு முன்னர், ஜீஜாக் ஜாலானான் செயற்பாட்டாளர் தெங்கு முஹம்மத் ஹாரித் ஹகிமின் தெங்கு அப்துல் அஜிஸ், பாதிக்கப்பட்டவரின் குடும்பம், அந்த தன்னார்வ தொண்டு நிறுவனத்திடமிருந்து மாதாந்திர உதவிகளைப் பெற்று வந்ததாகக் கூறினார்.

பிரேத பரிசோதனை ஏற்பாடுகளுக்காக, சிறுவனின் உடல் இன்னும் மருத்துவமனையில் இருப்பதாகவும், அடக்கம் செய்யும் விஷயங்களுக்கு அந்த தன்னார்வ தொண்டு நிறுவனம் உதவும் என்றும் அவர் கூறினார்.

-சங்கீர்த்தனா