மலேசியா, துருக்கி இணைந்த கல்வி நிறுவனத்தை நிறுவவும், கல்வி உதவித்தொகையை விரிவுபடுத்தவும் ஒப்புக்கொண்டுள்ளன

ஜார்ஜ்டவுன்: 

உயர்கல்வி உறவுகளை வலுப்படுத்துவதற்காக, ஒரு கூட்டுக் கல்வி நிறுவனத்தை நிறுவுவதற்கும், கல்வி உதவித்தொகை வாய்ப்புகளை விரிவுபடுத்துவதற்கும் மலேசியாவும் துருக்கியும் ஒப்புக்கொண்டுள்ளன.

இந்த மலேசியா-துருக்கி நிறுவனம், மலேசிய சர்வதேச இஸ்லாமிய பல்கலைக்கழகத்திலும், மலாயா பல்கலைக்கழகத்திலும் அமைக்கப்படும் என்றும், துருக்கி பக்கத்தில் அதற்கு இணையான ஒரு நிறுவனம் அடையாளம் காணப்படும் என்றும் உயர்கல்வி அமைச்சர் டத்தோஸ்ரீ டாக்டர் ஜாம்ரி அப்துல் காதிர் கூறியுள்ளார்.

மலாயா பல்கலைக்கழகம் கையெழுத்திட்ட புரிந்துணர்வு ஒப்பந்தத்தின் மூலம் தனது பங்கேற்பை ஏற்கனவே முறைப்படுத்தியுள்ளதாக ஜாம்ரி தெரிவித்தார்.

மலேசிய மாணவர்களுக்கு கல்வி உதவித்தொகையை வழங்க துருக்கி தயார்நிலையை வெளிப்படுத்தியுள்ளதாகவும், இந்த நடவடிக்கை இரு நாடுகளுக்கும் இடையிலான மாணவர் இயக்கத்தை அதிகரிக்கும் என்று எதிர்பார்க்கப்படுவதாகவும் அவர் கூறினார்.

"துருக்கி அரசாங்கத்தால் வழங்கப்படும் கல்வி உதவித்தொகை வாய்ப்புகளுடன், மேலும் பல மலேசிய மாணவர்களை அங்கு அனுப்ப முடியும் என்று நாங்கள் நம்புகிறோம்" என்று அவர் மேலும் தெரிவித்தார்.

மாணவர் வேலைவாய்ப்புக்கான துருக்கியின் சிறந்த பல்கலைக்கழகங்களை இரு தரப்பினரும் கூட்டாக அடையாளம் காண்பார்கள் என்று ஜாம்ரி கூறினார். 

பொறியியல், விண்வெளி ஆய்வுகள், பாதுகாப்பு தொடர்பான துறைகள் உட்பட மேம்பட்ட தொழில்நுட்பங்களில் அந்த நாடு வலுவான நிறுவனங்களைக் கொண்டுள்ளது என்பதைக் குறிப்பிட்டார்.

"இந்தப் பல்கலைக்கழகங்களை அடையாளம் கண்டு, குறிப்பாக அறிவியல், தொழில்நுட்பத்தில், எங்கள் மாணவர்களுக்கான பாதைகளை உருவாக்க விரும்புகிறோம்" என்றார் அவர்.

மலேசிய மாணவர்கள், கோலாலம்பூர் பல்கலைக்கழகத்தைச் சேர்ந்தவர்கள், மாரா ஜூனியர் சயின்ஸ் கல்லூரிகளைச் (எம்ஆர்எஸ்எம்) சேர்ந்தவர்கள் உட்பட, துருக்கியில் படிப்பதற்கான அணுகலை விரிவுபடுத்தும் முன்மொழிவுகளை துணைப் பிரதமர் டத்தோஸ்ரீ டாக்டர் அஹ்மத் ஜாஹித் ஹமிடி ஆதரித்ததாக அவர் கூறினார்.

"பொறியியல், நிலைத்தன்மையில் துருக்கி வலுவாக உள்ளது, அதே சமயம் மின்சாரம், மின்னணுவியலில் மலேசியா நன்மைகளைக் கொண்டுள்ளது. இது அர்த்தமுள்ள ஒத்துழைப்பை அனுமதிக்கிறது" என்று அவர் வலியுறுத்தினார்.

தற்போது, 272 மலேசியர்கள் மட்டுமே துருக்கியில் உயர்கல்வியைப் பயின்று வருகின்றனர், அதே சமயம் 107 துருக்கிய மாணவர்கள் மலேசியாவில் உள்ளனர்.

இதற்கிடையில், துருக்கியின் உயர்கல்வி குழுவின் தலைவர் பேராசிரியர் டாக்டர் எரோல் ஒஸ்வர், எதிர்காலத்தில், மிகவும் பரந்த அளவில் துருக்கியில் படிப்பதற்கான வாய்ப்புகளை மேலும் பல மலேசிய மாணவர்களுக்குத் திறப்பதாகக் கூறினார்.

"மருத்துவம், பொறியியல், சுகாதாரம் உள்ளிட்ட பல துறைகளில் துருக்கிய பல்கலைக்கழகங்களில் பதிவு செய்ய மலேசிய மாணவர்கள் வரவேற்கப்படுகிறார்கள்" என்று அவர் தெரிவித்தார். 

மேலும், அறிஞர்கள், ஆராய்ச்சியாளர்களின் பரிமாற்றத்தை அதிகரிப்பதிலும் இரு தரப்பினரும் ஆர்வமாக உள்ளனர் என்றார் அவர்.

-சங்கீர்த்தனா