குழந்தைகளின் பாதுகாப்பு கேள்விக்குறியா?: சட்டவிரோதக் குழந்தைகள் காப்பகங்கள் வைத்திருந்தவர்கள் மீது வழக்கு

கோலாலம்பூர்: 

கடந்த ஜனவரியில் செல்லுபடியாகும் பதிவுச் சான்றிதழ் இல்லாமல் செயல்பட்ட குற்றச்சாட்டில், ஒரு நர்சரியின் நிறுவனர் இன்று இங்குள்ள மாஜிஸ்திரேட் நீதிமன்றத்தில் குற்றஞ்சாட்டப்பட்டார்.

36 வயதுடைய டத்தின் நோர் ஃபாடிலா அலியாஸ், 34 வயதுடைய நூருல் ஐனா ஸுல்கிஃப்லி, 32 வயதுடைய நுர்கைருனிசா பத்ரில்லா (அனைவரும் சட்டப்படி குற்றம்சாட்டப்பட்டவர்கள் - OKS) ஆகியோர், மொழிபெயர்ப்பாளரால் வாசிக்கப்பட்ட அனைத்துக் குற்றச்சாட்டுகளையும் செவிம்டுத்தபின தாங்கள் குற்றமற்றவர்கள் என மறுத்தனர்.

இந்த வழக்குகள் மாஜிஸ்திரேட் அதிகா முஹம்மத்@முஹம்மத் சைம், மாஜிஸ்திரேட் கைருன்னிசாக் ஹஸ்னி, மாஜிஸ்திரேட் ஐனா அஸாஹ்ரா அரிஃபின் ஆகியோர் முன்னிலையில் விசாரிக்கப்பட்டது.

குற்றச்சாட்டுகளின்படி, நோர் ஃபாடிலாவும், நூருல் ஐனாவும் இணைந்து, 1984 ஆம் ஆண்டின் குழந்தைகள் பராமரிப்பு மையச் சட்டத்தின் விதிகளின் கீழ் பதிவு செய்யப்படாத ஒரு குழந்தைகள் பராமரிப்பு மையத்தை (taska) நடத்தியதாகக் குற்றம் சாட்டப்பட்டுள்ளனர்.

இந்தக் குற்றம், கடந்த ஜனவரி 9 ஆம் தேதி, மதியம் 3.25 மணியளவில், இங்குள்ள பிரிக்ஃபீல்ட்ஸ், தாமான் டானாவ் டெசாவில் செய்யப்பட்டதாகக் கூறப்படுகிறது.

ஒரு தனி நீதிமன்றத்தில், நோர் ஃபாடிலாவும், நுர்கைருனிசாவும் இணைந்து, கடந்த பிப்ரவரி 5 ஆம் தேதி, காலை 10.15 மணியளவில், இங்குள்ள செராஸ், ஜாலான் ஆலம் சுதேராவில் உள்ள ஒரு நர்சரியில், இதே போன்ற குற்றச்சாட்டில் குற்றஞ்சாட்டப்பட்டனர்.

இந்த இரண்டு குற்றச்சாட்டுகளும், 1984 ஆம் ஆண்டின் குழந்தைகள் பராமரிப்பு மையச் சட்டத்தின் பிரிவு 6(1)-ன் கீழ், தண்டனைச் சட்டத்தின் பிரிவு 34-உடன் இணைந்து வாசிக்கப்பட்டு தாக்கல் செய்யப்பட்டுள்ளன. குற்றம் நிரூபிக்கப்பட்டால், அதிகபட்சம் 10,000 ரிங்கிட் அபராதம், இரண்டு ஆண்டுகள் வரை சிறைத்தண்டனை, அல்லது இரண்டும் விதிக்கப்படலாம்.

கடந்த பிப்ரவரி 5 ஆம் தேதி, இங்குள்ள மேடான் நியாகா ரம்பாயில் உள்ள ஒரு நர்சரியில் செய்த அதே குற்றத்திற்காகவும் நோர் ஃபாடிலா மீது குற்றம் சாட்டப்பட்டுள்ளது.

துணை வழக்குத் தொடரும் அதிகாரிகள் நுரிவானினா இப்ராஹிம், நுரைனிசாத்துல் ஃபர்ஹானா ஜைனல்,  ஹெஞ்ச் கோ ஆகியோர் வழக்குத் தொடர்பை மேற்கொண்டனர். அதே சமயம், அனைத்துக் குற்றஞ்சாட்டப்பட்டவர்களும் வழக்கறிஞர் சையத் ஆடம் அல்-அகிப் சையத் முஹம்மத் ரெட்சாவால் பிரதிநிதித்துவப்படுத்தப்பட்டனர்.

அனைத்துக் குற்றச்சாட்டுகளுக்கும், ஒரு உத்தரவாததாரருடன் 9,000 ரிங்கிட் ஜாமீனில் நோர் ஃபாடிலாவை விடுவிக்க நீதிமன்றம் அனுமதித்தது. நூருல் ஐனா 2,500 ரிங்கிட் ஜாமீனிலும், நுர்கைருனிசா 3,500 ரிங்கிட் ஜாமீனிலும் விடுவிக்கப்பட்டனர்.

ஆவணங்களைச் சமர்ப்பிப்பதற்காக, வழக்கின் மறு பரிசீலனை அடுத்த ஜூன் 15 ஆம் தேதிக்கு நீதிமன்றம் நிர்ணயித்தது.

கடந்த புதன்கிழமை, இதே குற்றச்சாட்டில், நோர் ஃபாடிலாவும், ஒரு நர்சரி மேலாளரும் சிலாங்கூரின் ஷா ஆலம் மாஜிஸ்திரேட் நீதிமன்றத்தில் ஆஜர்படுத்தப்பட்டனர்.

-சங்கீர்த்தனா