பயணிகளின் வசதிக்காக 6 விமான நிலையங்கள் தயார்: சவுதி அரேபியாவின் பிரம்மாண்ட ஏற்பாடு

ரியாத்: 

2026-ஆம் ஆண்டிற்கான புனித யாத்திரையை முன்னிட்டு, உலகெங்கிலும் இருந்து வரும் பயணிகளின் வசதிக்காகச் சவுதி அரேபியாவின் சிவில் விமானப் போக்குவரத்து ஆணையம் விரிவான ஏற்பாடுகளைச் செய்துள்ளது. 

இதன்படி, ஹஜி பயணிகளுக்காக மொத்தம் 31 லட்சம் இருக்கைகளும், 12,000-க்கும் மேற்பட்ட விமானச் சேவைகளும் தயார் நிலையில் உள்ளதாக அறிவிக்கப்பட்டுள்ளது.

சர்வதேசத் தரத்திற்கு இணையாக, பாதுகாப்பான, தடையற்ற பயண அனுபவத்தை உறுதி செய்வதே இந்த முன்னேற்பாடுகளின் முக்கிய நோக்கமாகும். 

இதற்காகச் சவுதி அரேபியாவின் ஆறு முக்கிய விமான நிலையங்கள் தீவிரமாக தயார்படுத்தப்பட்டுள்ளன. குறிப்பாக ஜெத்தா, மதீனா, ரியாத், தம்மாம், தாயிஃப், யான்பு ஆகிய நகரங்களில் உள்ள சர்வதேச விமான நிலையங்கள் வழியாகப் புனிதப் பயணிகள் வந்து செல்லச் சிறப்பு வசதிகள் செய்யப்பட்டுள்ளன.

சவுதி அரேபியாவின் 'விஷன் 2030' (Vision 2030) திட்டத்தின் ஒரு அங்கமாக, புனித யாத்திரை, உம்ரா பயணிகளுக்கு வழங்கப்படும் சேவைகளின் தரத்தை மேம்படுத்தும் நோக்கில் இந்த நடவடிக்கைகள் எடுக்கப்பட்டுள்ளன. 

சம்பந்தப்பட்ட அனைத்துத் துறைகளையும் ஒருங்கிணைத்து, பயணிகள் எவ்விதச் சிரமமுமின்றித் தங்களது கடமைகளை நிறைவேற்றுவதை உறுதி செய்யச் சவுதி அரசாங்கம் உறுதிபூண்டுள்ளது.

இந்த மிகப்பெரிய அளவிலான விமானப் போக்குவரத்துத் திட்டம், வழக்கமான, சிறப்பு விமானச் சேவைகளை உள்ளடக்கியது. இதன் மூலம் மில்லியன் கணக்கான மக்கள் அமைதியான முறையில் புனித யாத்திரை மேற்கொள்ள வழிவகை செய்யப்பட்டுள்ளது எனச் சவுதி செய்தி நிறுவனம் தெரிவித்துள்ளது.

-கிரித்திக்கா