எல்லை தாண்டி வந்த போர் மேகங்கள்: அவசரமாக வெளியேற்றப்பட்ட எல்லையோர கிராம மக்கள்

மே ஹாங் சான்: 

மியான்மர், மே ஹாங் சான் மாவட்டத்திற்கு அருகில், தாய்லாந்து பிரதேசத்தில் குண்டுகளை வீழ்த்தி வான் தாக்குதலை நடத்தியதாக உள்ளூர் அதிகாரிகள் தெரிவித்தனர். இதனால் அந்தப் பகுதியில் உள்ள குடியிருப்பாளர்கள் வெளியேற்றப்பட்டுள்ளனர்.

நேற்று உள்ளூர் நேரப்படி காலை 11 மணியளவில், மியான்மர் விமானப்படை, யாக்-130,மிக்-29 போர் விமானங்களைப் பயன்படுத்தி, கரேன் தேசிய ஒன்றியத்திற்கு (கே.என்.யூ.) சொந்தமான ஒரு மருத்துவமனை உட்பட அருகிலுள்ள குடியிருப்புகள் மீது வான் தாக்குதலை நடத்தியதாக அறிக்கைகள் தெரிவிக்கின்றன.

அந்தப் பகுதி, மே ஹாங் சான் மாவட்டத்திற்கு அருகிலுள்ள சோப் மோய் துணை மாவட்டத்தில் உள்ள மே சாம் லேப் பகுதிக்கு எதிரே, எல்லையில் இருந்து சுமார் 500 மீட்டர் தொலைவில் அமைந்துள்ளது.

அந்தத் தாக்குதலால், கரேன் மாநிலத்தின் ஹ்பாபுன் மாவட்டத்தில் உள்ள உ மி தா, உ சு தா கிராமங்கள் பாதிக்கப்பட்டன.

இதுவரை, சம்பந்தப்பட்ட தாக்குதலின் விளைவாக ஏற்பட்ட சேதமும் உயிரிழப்புகளும் இன்னும் அடையாளம் காணப்படவில்லை.

பான் மே சாம் லேப் பகுதியில் உள்ள சால்வீன் ஆற்றின் அருகில் ஒரு குண்டு தாய்லாந்து பிரதேசத்தில் விழுந்ததாகத் தெரிகிறது. இது உள்ளூர் மக்களிடையே பீதியை ஏற்படுத்தியது.

மே சாம் லேப் பகுதியில் நிறுத்தப்பட்டிருந்த 36வது ரேஞ்சர் படைப்பிரிவின் அதிகாரிகள், மே சாம் லேப் துணை மாவட்ட நிர்வாக அமைப்புடன் இணைந்து, சம்பந்தப்பட்ட இடத்திற்கு அருகில் வசித்து வந்த தாய் குடியிருப்பாளர்களைப், மே சாம் லேப்பில் உள்ள ஹுய் காங் காட் கிராமத்திற்கு கொண்டுச் செல்ல விரைந்து நடவடிக்கை எடுத்தனர்.

கடந்த சில வாரங்களாக, மியான்மரில் சண்டை அதிகரித்து வருவதாகத் தெரிகிறது.

மே ஹாங் சானின் மே சாரியாங் மாவட்டத்தில் உள்ள மே யூம் துணை மாவட்டத்தின் பான் தா தா ஃபாங்கிற்கு எதிரே உள்ள பகுதியில், கே.என்.யூ.-வுடன் தொடர்பு கொண்ட சமூகங்கள் மீது மியான்மர் விமானம் குண்டுகளை வீழ்த்துவதாகக் கூறப்படுகிறது.

குண்டுத் துண்டுகள் காரணமாக கரேன் இன மக்கள் காயமடைந்ததாகவும், மே சாம் லேப் மருத்துவமனையில் சிகிச்சைக்காக தாய்லாந்திற்கு கொண்டுச் செல்லப்பட்டதாகவும் அறிக்கைகள் தெரிவிக்கின்றன.

-சங்கீர்த்தனா