பிரிட்டனை ஆபத்து நெருங்குகிறதா? - ஓர் அரசியல் பார்வை

பிரிட்டன் ஒரு காலத்தில் உலகையே ஆண்ட வல்லரசாக இருந்திருக்கலாம், ஆனால் இன்றைய 2026-ஆம் ஆண்டின் சூழலில் அதன் ராணுவ, அரசியல் வியூகங்கள் முற்றிலும் மாறியுள்ளன. 

மத்திய கிழக்கில் அமெரிக்காவிற்கும் ஈரானுக்கும் இடையே போர் மேகங்கள் சூழ்ந்துள்ள போதிலும், பிரிட்டன் அதில் நேரடியாகப் பங்கெடுக்காமல் ஒரு 'மூலோபாய இடைவெளியை' (Strategic Distance) கடைபிடிப்பதைக் காண முடிகிறது.

இதற்குப் பின்னால் வெறும் சமாதான விருப்பம் மட்டும் இல்லை; மாறாக, பிரிட்டனின் தேசியப் பாதுகாப்பு, பொருளாதார நெருக்கடி, எல்லைகளுக்கு அப்பாற்பட்ட ரஷ்ய அச்சுறுத்தல் ஆகிய மூன்று முக்கிய காரணங்கள் உள்ளன. 

தனது சொந்த நாட்டு மக்களின் அடிப்படைத் தேவையான எரிசக்தி மற்றும் இணையப் பாதுகாப்பை உறுதி செய்வதே இன்றைய லண்டன் அரசாங்கத்தின் முதன்மையான இலக்காக உள்ளது. 

தொலைதூர தேசங்களில் நடக்கும் போர்களில் தன் வளங்களைச் செலவிடுவதை விட, தன் வீட்டு வாசலில் (வடக்கு அட்லாண்டிக் கடல்) ரஷ்யா விரித்துள்ள வலையைச் சிதைப்பதே பிரிட்டனின் தற்போதைய முன்னுரிமை.

இந்தத் தயக்கத்திற்குப் பின்னாலுள்ள ஆழமான ராணுவ அரசியல் காரணங்களை நாம் விரிவாகப் பார்ப்போம்."

உலக நாடுகளின் கவனம் முழுவதும் ஹார்முஸ் ஜலசந்தியின் (Strait of Hormuz) மீது இருந்தபோது, ரஷ்யா மிகவும் நிதானமாகவும், திட்டமிட்டபடியும் வடக்கு நோக்கித் தன் நகர்வுகளை மேற்கொண்டுள்ளது. 

இது வெறும் கருத்து அல்ல, ஆவணப்படுத்தப்பட்ட உண்மைகளின் தொகுப்பு.

உண்மை-1:

பிப்ரவரி 28, 2026 அன்று, அமெரிக்காவும் இஸ்ரேலும் எந்தவொரு நேட்டோ (NATO) நட்பு நாடுகளுடனும் கலந்தாலோசிக்காமல் ஈரான் மீது தாக்குதல்களைத் தொடங்கின. 

இதற்குப் பதிலடியாக ஈரான் ஹார்முஸ் ஜலசந்தியை மூடியது. இதன் விளைவாக உலக எண்ணெய் விநியோகத்தில் ஐந்தில் ஒரு பங்கு தடைபட்டது.

டிரம்ப் இந்த விவகாரத்தில் தலையிட்டு அந்தப் பாதையைச் சீர் செய்யுமாறு நேட்டோ நாடுகளை வலியுறுத்தினார். அவ்வாறு செய்யத் தவறினால் நேட்டோ கூட்டணிக்கு "மிக மோசமான எதிர்காலம்" அமையும் என எச்சரித்தார்.

இதற்கு கூட்டணி நாடுகளின் மறுப்பு தெரிவித்தன.

ஜெர்மனியின் பாதுகாப்பு அமைச்சர்  Boris Pistorius "இது எங்கள் போர் அல்ல; நாங்கள் இதைத் தொடங்கவில்லை," எனத் தெள்ளத்தெளிவாகக் கூறினார்.

பிரிட்டனின் Keir Starmer  பிரிட்டன் இந்த விரிவான மோதலில் ஈர்க்கப்படாது என அறிவித்தார்.

ஸ்பெயின் நாடு இதற்கு நேரடியான மறுப்பைத் தெரிவித்தது.

இதனால் ஆத்திரமடைந்த டிரம்ப், நேட்டோ நாடுகளைப் பகிரங்கமாக "கோழைகள்" என்று விமர்சித்தார். பல மாதங்களாகக் கூட்டணி நாடுகளை அவமதித்துவிட்டு, திடீரென ராணுவ உதவியைக் கோருவது விந்தையானது என Estoniaவின்  முன்னாள் அதிபர் Thomas Hendrix சுட்டிக்காட்டினார்.

உண்மை 2: 

மத்திய கிழக்கின் பதற்றம் ஊடகங்களை ஆக்கிரமித்திருந்தபோது, ரஷ்யா தன் அணுசக்தி பலத்தை வடக்கு நோக்கித் திருப்பியது. 2026-ஆம் ஆண்டின் அமெரிக்க உளவுத்துறை அறிக்கையின்படி, ரஷ்யாவின் ஒட்டுமொத்த அணுசக்தித் தாக்குதல் திறனில் மூன்றில் இரண்டு பங்கு தற்போது கோலா தீபகற்பத்தில் (Kola Peninsula) நிலைநிறுத்தப்பட்டுள்ளது.

நார்வே எல்லையிலிருந்து வெறும் 100 கி.மீ தொலைவில் உள்ள Gadzhiyevo தளத்தில் ரஷ்யாவின் ஏழு பாலிஸ்டிக் ஏவுகணை நீர்மூழ்கிக் கப்பல்கள் நிறுத்தி வைக்கப்பட்டுள்ளன. 

கிரீன்லாந்து, ஐஸ்லாந்து, பிரிட்டன் இடையேயான GIUK Gap பகுதியில் ரஷ்ய நீர்மூழ்கிக் கப்பல்களின் நடமாட்டம் பனிப்போர் காலத்தை விட அதிகமாக உள்ளது. 
இந்தப் பகுதியை ரஷ்ய நீர்மூழ்கிக் கப்பல்கள் கடந்துவிட்டால், அவை அமெரிக்காவின் கிழக்கு கடற்கரையையும் ஐரோப்பியத் தலைநகரங்களையும் எளிதில் தாக்க முடியும்.

உண்மை 3: 

ஏப்ரல் 9, 2026 அன்று, பிரிட்டன் பாதுகாப்புச் செயலாளர் John Healy ஒரு ரகசிய ராணுவ நடவடிக்கையின் முடிவை வெளியிட்டார். 
பிரிட்டனின் வடக்கே உள்ள ஆழ்கடல் கேபிள் கட்டமைப்புகளுக்கு அருகில் உளவு பார்த்த ஒரு ரஷ்யத் தாக்குதல் நீர்மூழ்கிக் கப்பலையும், இரண்டு உளவு நீர்மூழ்கிக் கப்பல்களையும் பிரிட்டன் மற்றும் நார்வே படைகள் ஒரு மாத காலம் கண்காணித்து விரட்டியடித்தன.

இந்த நடவடிக்கைகளை ரஷ்யாவின் GUGI (Main Directorate of Deep Sea Research) அமைப்பு ஒருங்கிணைத்தது. இந்த அமைப்பு அமைதிக் காலத்தில் மேற்கத்திய நாடுகளின் எரிசக்தி குழாய்கள் மற்றும் கேபிள்களை வரைபடமாக்கி, போர் காலத்தில் அவற்றைச் செயலிழக்கச் செய்ய வடிவமைக்கப்பட்டதாகும்.

"மத்திய கிழக்கு விவகாரங்களில் நாம் திசைதிருப்பப்பட வேண்டும் என்று புடின் விரும்புகிறார். ஆனால் நாங்கள் புடின் மீதான எங்கள் பார்வையைத் திருப்ப மாட்டோம்." - என John Healy கூறியுள்ளார். 

உண்மை 4: 

ரஷ்யாவின் இந்த அச்சுறுத்தலை உணர்ந்த நேட்டோ, பிப்ரவரி 2026-இல் 'ஆர்க்டிக் சென்ட்ரி' (Arctic Sentry) என்ற புதிய திட்டத்தைத் தொடங்கியது. இதன் மூலம் ஆர்க்டிக் பகுதியில் உள்ள அனைத்து நடவடிக்கைகளும் ஒரே தலைமையின் கீழ் கொண்டு வரப்பட்டன.

பிரிட்டன் தனது படைகளை நார்வேயில் இருமடங்காக அதிகரித்துள்ளது.

• சுவீடன் தனது கிரிப்பன் (Gripen) போர் விமானங்களை கிரீன்லாந்து நோக்கி அனுப்பியது.

• ஜெர்மனி யூரோஃபைட்டர் (Eurofighter) விமானங்களை நிலைநிறுத்தியுள்ளது.

• பிரிட்டன் கடற்பகுதிகளில் ரோந்துப் பணிகள் 30% அதிகரிக்கப்பட்டுள்ளன.

டிரம்ப் நேட்டோ நாடுகளை தெற்கு நோக்கிப் பார்க்கச் சொல்லி வற்புறுத்தியதும், அவர்கள் மறுத்தபோது அவர்களை அவமதித்ததும் ரஷ்யாவிற்குச் சாதகமாக அமைந்தது. 

எதிரியின் கவனத்தை ஓரிடத்தில் நிலைநிறுத்திவிட்டு, மற்றொரு திசையில் முன்னேறுவது என்பது பழமையான ராணுவத் தந்திரம்.

பிரிட்டன் இதை முன்கூட்டியே கவனித்துவிட்டது. இப்போது கேள்வி என்னவென்றால், மற்ற கூட்டணி நாடுகள் இன்னும் ஹார்முஸ் ஜலசந்தியையே பார்த்துக் கொண்டிருக்கின்றனவா அல்லது ரஷ்யாவின் உண்மையான நகர்வைப் புரிந்து கொண்டுள்ளனவா என்பதுதான்.

பிரிட்டன் ஏன் இவ்வளவு பயப்படுகிறது என்றால் அதற்கு காரணங்கள் உள்ளன.

பிரிட்டன் (UK) ஒரு தீவு நாடு என்பதால், அதன் ஒட்டுமொத்த வாழ்வாதாரமும் கடலுக்கு அடியில் உள்ள கட்டமைப்புகளைச் சார்ந்தே இருக்கிறது. இதனால்தான் ரஷ்யாவின் அண்மைய நகர்வுகள் பிரிட்டனுக்குப் பெரும் அச்சத்தை ஏற்படுத்தியுள்ளன.

பிரிட்டனின் 99% சர்வதேசத் தரவுப் போக்குவரத்து (Data Traffic) கடலுக்கு அடியிலுள்ள கேபிள்கள் வழியாகவே நடக்கிறது.

பிரிட்டனை உலகத்துடன் இணைக்கும் சுமார் 60 கேபிள்கள் உள்ளன.

ரஷ்யா இந்தக் கேபிள்களைத் துண்டித்தால், பிரிட்டனில் இணையம், வங்கிச் சேவைகள் மற்றும் தொலைத்தொடர்பு முழுமையாக முடங்கும். இது நாட்டை ஒரு நிமிடம் கூட இயங்க விடாமல் செய்துவிடும்.

பிரிட்டன் வீடுகளுக்குத் தேவையான எரிவாயுவில் (Gas) சுமார் 50% கடலுக்கு அடியில் உள்ள குழாய்கள் மூலமாகவே வருகிறது.

ரஷ்யாவின் GUGI போன்ற ஆழ்கடல் ஆராய்ச்சி அமைப்புகள் இந்தக் குழாய்களைச் சேதப்படுத்தினால், பிரிட்டனில் கடும் மின்வெட்டும், குளிர்காலத்தில் வெப்பமூட்டும் வசதிகள் இல்லாமலும் போகும். இது பொதுமக்களின் வாழ்க்கையை நேரடியாகப் பாதிக்கும்.

நேரடியாகப் போர் அறிவிக்காமல், ஒரு நாட்டின் பொருளாதாரத்தை மறைமுகமாகச் சிதைப்பது ரஷ்யாவின் தந்திரம். அதை நிழல் போர்  (Hybrid/Shadow Warfare) என அழைப்பார்கள்.

ஏப்ரல் 9, 2026 அன்று பிடிபட்ட ரஷ்ய நீர்மூழ்கிக் கப்பல்கள், அமைதிக் காலத்தில் இந்தக் கேபிள்களை ஆய்வு செய்வதும், போர் என்று வரும்போது அவற்றைச் 'சதிவேலை' (Sabotage) மூலம் அழிக்கத் திட்டமிடுவதும்தான் பிரிட்டனின் இன்றைய பிரதான கவலை.

பிரிட்டன் அட்லாண்டிக் பெருங்கடலின் நுழைவாயிலில் உள்ளது.

ரஷ்யாவின் அணுசக்தி நீர்மூழ்கிக் கப்பல்கள் இந்தப் பாதையைக் கடந்துவிட்டால், அவற்றைக் கண்டுபிடிப்பது மிகவும் கடினம்.

நீர்மூழ்கிக் கப்பல் ஒரேஒரு கேபிளைத் துண்டித்தால் கூட, அது கோடிக்கணக்கான பவுண்டுகள் இழப்பை ஏற்படுத்தும்,

"நாம் மத்திய கிழக்கில் ஈரானையும் இஸ்ரேலையும் பார்த்துக் கொண்டிருக்கும்போது, நம் வீட்டு வாசலில் (கடலுக்கு அடியில்) ரஷ்யா ஆபத்தை ஏற்படுத்திக் கொண்டிருக்கிறது" என்பதுதான் பிரிட்டனின் அச்சம். 

இதனால்தான் டிரம்ப் போன்ற தலைவர்கள் கவனத்தைத் திசைதிருப்ப முயலும்போது பிரிட்டன் அதைத் தீவிரமாக எதிர்க்கிறது.

ரஷ்யா நேரடியாகப் பிரிட்டன் மீது குண்டு வீசுவதை விட, அதன் "வாழ்க்கை நரம்புகளை" (Life-lines) துண்டிக்கப் பார்க்கிறது. இதுதான்  பிரிட்டனின் அந்தப் பயத்திற்குக் காரணம்.

- முகிந்தன் துரைராஜசிங்கம்