கட்டுக்கோப்பான கடமை: அரசு ஊழியர்களின் உற்பத்தித்திறனை அதிகரிக்கும் முறையான திட்டமிடல்

கோலாலம்பூர்: 

வீட்டிலிருந்து பணியாற்றும் (BDR) முறையில் அரசு ஊழியர்கள் அதிகக் கவனத்துடனும், செயல்திறனுடனும் செயல்படுவதற்கு முறையான திட்டமிடலும் சுய ஒழுக்கமுமே அடிப்படைத் தேவைகளாக உள்ளன. 

இது குறித்து கருத்துத் தெரிவித்துள்ள சுங்கை பூலோ பாதுகாப்பு சேமிப்புக் கிடங்கின் உதவி நிர்வாக அதிகாரி மரியா லிசா, முன்கூட்டியே தயார் செய்யப்பட்ட பணிப் பட்டியல்கள், நவீனத் தொழில்நுட்பங்கள் பணிகளைத் தடையின்றிச் செய்ய உதவுவதாகக் குறிப்பிட்டுள்ளார்.

அரசு ஊழியர்களின் வருகையைப் பதிவு செய்ய 'ஸ்பாட்மீ' (SpotMe) செயலி பயன்படுத்தப்படுவதோடு, பணியாளர்களின் இருப்பிடமும் நேரலையில் கண்காணிக்கப்படுகிறது. 

தினமும் காலையில் 'கூகுள் மீட்' (Google Meet) வாயிலாகக் கலந்துரையாடல் கூட்டங்கள் நடத்தப்பட்டு, புதிய தகவல்கள் ஊழியர்களிடையே பகிரப்படுகின்றன. நேரடித் தொடர்பு குறைவாக இருந்தாலும், வாட்சப் போன்ற செயலிகள் வழியாகத் தகவல்தொடர்பு தடையின்றி நடைபெறுவதை அதிகாரிகள் உறுதி செய்கின்றனர்.

வீட்டிலிருந்து பணிபுரிவது பொதுமக்களுக்கான சேவையைப் பாதிக்காது எனத் தெரிவித்துள்ள அவர், பெரும்பாலான அரசு சேவைகள் தற்போது இணைய வழியில் கிடைப்பதைச் சுட்டிக்காட்டினார். 

அத்தியாவசியத் துறைகளில் மட்டும் ஊழியர்கள் சுழற்சி முறையில் அலுவலகம் வந்து பணியாற்றுவது ஆலோசிக்கப்படலாம். மேலும், கடினமான சூழலிலும் நேர்மையுடனும் தொழில்முறை ஒழுக்கத்துடனும் செயல்படுமாறு தலைமைச் செயலாளர் விடுத்த வேண்டுகோளை ஊழியர்கள் பின்பற்றி வருகின்றனர்.

கடந்த காலங்களில் ஏற்பட்ட அனுபவங்கள், தற்போது இந்தப் புதிய பணிமுறைக்கு எளிதில் மாற உதவியுள்ளதாகக் குறிப்பிட்ட மரியா லிசா, அலுவலகத்திலிருந்து 8 கிலோமீட்டருக்கும் அதிகத் தொலைவில் வசிப்பவர்களுக்கு முன்னுரிமை அளிக்கப்படுவதாகக் கூறினார். ஊழியர்களின் செயல்பாடு, பாதுகாப்புத் துறையின் தேவைகளைக் கருத்தில்கொண்டு, இந்த முறையில் அவ்வப்போது மேம்பாடுகள் செய்யப்படும் என்றும் எதிர்பார்க்கப்படுகிறது.

-கிரித்திக்கா