நாக்பூரில் அதிர்ச்சி சம்பவம்: இளம்பெண்ணைச் சித்திரவதை செய்த கணவர் கைது

நாக்பூர்: 

மகாராஷ்டிர மாநிலம் நாக்பூரில், 25 வயது இளம்பெண் ஒருவர் தனது கணவர், அவரது குடும்பத்தினர் மீது பாலியல் வன்கொடுமை, கட்டாயத் திருமணம் செய்ததாகப் புகார் அளித்துள்ளார். 

பாதிக்கப்பட்ட பெண்ணின் புகாரின்படி, குற்றம் சாட்டப்பட்ட நபர் முதலில் தன்னை ஏமாற்றிப் பாலியல் வன்கொடுமை செய்ததாகவும், பின்னர் அந்தத் தனியார் காணொலிகளைக் காட்டி மிரட்டித் தன்னைத் திருமணம் செய்து கொண்டதாகவும் தெரிவித்துள்ளார்.

திருமணத்திற்குப் பிறகு, கணவர், அவரது குடும்பத்தினர் அப்பெண்ணைத் தொடர்ந்து வரதட்சணை கேட்டுத் துன்புறுத்தியதோடு மட்டுமல்லாமல், விசித்திரமான மாந்திரீகச் சடங்குகளில் ஈடுபடுமாறு கட்டாயப்படுத்தியுள்ளனர். 

மாந்திரீகக் கலைகளின் மூலம் அப்பெண்ணைச் சித்திரவதை செய்ததாகவும், அவரது விருப்பத்திற்கு மாறாகப் பல்வேறு சடங்குகளைச் செய்ய வைத்ததாகவும் அந்தப் பெண் தனது புகாரில் உருக்கமாகக் குறிப்பிட்டுள்ளார். இந்தப் புகாரானது அப்பகுதியில் பெரும் அதிர்ச்சியை ஏற்படுத்தியுள்ளது.

இச்சம்பவம் குறித்து வழக்குப் பதிவு செய்துள்ள நாக்பூர் காவல்துறை, முதற்கட்ட விசாரணையைத் தீவிரப்படுத்தியுள்ளது. பெண்ணின் கணவரைக் கைது செய்துள்ள அதிகாரிகள், இக்கொடூரச் செயலுக்குத் துணையாக இருந்த அவரது குடும்ப உறுப்பினர்களிடமும் விசாரணை நடத்தி வருகின்றனர். பாதிக்கப்பட்ட பெண்ணுக்கு முறையான மருத்துவப் பரிசோதனைகள் செய்யப்பட்டு, அவருக்குத் தேவையான பாதுகாப்பு, ஆலோசனைகள் வழங்கப்பட்டு வருகின்றன.

பெண்களுக்கு எதிரான இத்தகைய வன்கொடுமைகள், மூடநம்பிக்கை சார்ந்த சித்திரவதைகள் கண்டிக்கத்தக்கது எனச் சமூக ஆர்வலர்கள் தெரிவித்துள்ளனர். குற்றவாளிகள் மீது கடும் சட்ட நடவடிக்கை எடுக்கப்படும் எனப் காவல்துறை உயரதிகாரிகள் உறுதி அளித்துள்ளனர். இச்சம்பவம் தொடர்பாக மேலதிக விசாரணைகள் தொடர்ந்து நடைபெற்று வருகின்றன.

-கிரித்திக்கா