சுற்றுச்சூழலைப் பாதுகாக்க மத்திய அரசின் அதிரடி நடவடிக்கை: பிளாஸ்டிக் உற்பத்தியாளர்களுக்குப் புதிய நெறிமுறைகள்

டெல்லி:

இந்தியாவில் பிளாஸ்டிக் கழிவுகளின் தாக்கத்தைக் குறைக்கும் நோக்கில், பிளாஸ்டிக் பொட்டலங்கள் தயாரிப்பில் மறுசுழற்சி செய்யப்பட்ட பிளாஸ்டிக்கைப் பயன்படுத்துவதை மத்திய அரசு தற்போது கட்டாயமாக்கியுள்ளது. 

இதற்காக 'பிளாஸ்டிக் கழிவு மேலாண்மை விதிகள் 2024'-இல் புதிய திருத்தங்கள் கொண்டுவரப்பட்டுள்ளன. இதன் மூலம், பிளாஸ்டிக் பொருட்களைத் தயாரிக்கும் நிறுவனங்கள், இனிவரும் காலங்களில் குறிப்பிட்ட சதவீதத்திற்கு மறுசுழற்சி செய்யப்பட்ட மூலப்பொருட்களையே பயன்படுத்த வேண்டும் என்பது சட்டமாக்கப்பட்டுள்ளது.

இந்த புதிய விதிகளின்படி, பிளாஸ்டிக் உற்பத்தியாளர்கள், இறக்குமதியாளர்கள் தாங்கள் தயாரிக்கும் பொட்டலங்களில் ஆண்டுதோறும் மறுசுழற்சி செய்யப்பட்ட பிளாஸ்டிக் அளவைப் படிப்படியாக அதிகரிக்க வேண்டும். 

குறிப்பாக, உணவல்லாத பொருட்களைக் கையாளும் பிளாஸ்டிக் உரைகள், பைகளில் இந்த விதிகள் மிகக் கடுமையாகப் பின்பற்றப்படும். இது 'சுழற்சிப் பொருளாதாரம்' (Circular Economy) எனப்படும் முறையை வலுப்படுத்துவதோடு, புதிய பிளாஸ்டிக் உற்பத்திக்காகச் செலவிடப்படும் கச்சா எண்ணெய், இயற்கை வளங்களின் தேவையைக் குறைக்க உதவும் என்று எதிர்பார்க்கப்படுகிறது.

இந்த விதிமுறைகளை மீறும் நிறுவனங்களுக்குக் கடுமையான அபராதம் விதிக்கப்படும் என்றும் மத்திய சுற்றுச்சூழல் அமைச்சகம் எச்சரித்துள்ளது. இந்த அதிரடி நடவடிக்கை, இந்தியாவின் நிலப்பரப்பு, நீர்நிலைகளில் பிளாஸ்டிக் கழிவுகள் சேர்வதைத் தடுத்து, பசுமையான எதிர்காலத்தை உருவாக்க வழிவகுக்கும்.

இந்த முன்னெடுப்பு, குப்பை மேடுகளில் பிளாஸ்டிக் சேர்வதைக் குறைப்பது மட்டுமின்றி, மறுசுழற்சித் துறையில் புதிய வேலைவாய்ப்புகளை உருவாக்கி, ஒரு நிலையான பொருளாதார வளர்ச்சியை எட்ட உதவும் என்று சுற்றுச்சூழல் ஆர்வலர்கள் பாராட்டு தெரிவித்துள்ளனர்.

-கிரித்திக்கா