அமெரிக்க மண்ணில் பிறந்தால் இனி குடிமகன் இல்லையா?

வாஷிங்டன்: 

அமெரிக்க ஜனாதிபதி டொனால்ட் டிரம்ப், பிறப்பு உரிமை குடியுரிமை தொடர்பான வழக்கில் இன்று அமெரிக்க உச்ச நீதிமன்றத்திற்கு நேரில் வருவதாக கூறினார்.

அமெரிக்காவில் பிறப்பு உரிமை குடியுரிமையை கட்டுப்படுத்தும் டிரம்பின் உத்தரவின் சட்டப்பூர்வத்தன்மை குறித்த வாதங்களை உச்ச நீதிமன்றம் இன்று விசாரிக்க திட்டமிட்டுள்ளது.

அமெரிக்காவில் பிறந்தவர்களுக்கு குடியுரிமை வழங்குவது அடிப்படையில் அரசியலமைப்பின் 14-வது திருத்தத்தைக் குறிக்கிறது.

இது பெற்றோரின் குடியுரிமை அல்லது குடியேற்ற நிலையைப் பொருட்படுத்தாமல் அமெரிக்க மண்ணில் பிறந்த கிட்டத்தட்ட அனைவரும் தானாகவே அந்த நாட்டின் குடிமக்களாக மாறுவதாக நிர்ணயிக்கிறது.

எனினும் 2026-ன் தொடக்கத்திலிருந்து பிறப்பு உரிமை குடியுரிமை குறித்த விளக்கம் சட்ட, அரசியல் விவாதத்தின் முக்கிய கவனமாக மாறியுள்ளது.

2025-ல் நிறைவேற்று ஆணை 14160, ஆவணமற்ற குடியேற்றவாசிகள் அல்லது தற்காலிக விசா வைத்திருப்பவர்களின் குழந்தைகளுக்குப் பிறப்பு உரிமை குடியுரிமையைக் கட்டுப்படுத்த முயற்சித்தது.

பிறப்பு உரிமை குடியுரிமை அரசியலமைப்பில் பொறிக்கப்பட்டுள்ளது என்றும், நிறைவேற்று ஆணை அல்லது காங்கிரஸ் நிறைவேற்றும் சாதாரண சட்டத்தால் மாற்ற முடியாது என்றும், எந்தவொரு மாற்றத்திற்கும் அரசியலமைப்பு திருத்தம் தேவை என்றும் பெரும்பாலான அரசியலமைப்பு நிபுணர்கள் கருதுகிறார்கள்.

 குடியேற்றத்திற்கு எதிரான விரிவான, கடுமையான நடவடிக்கையின் ஒரு பகுதியாகவும், 19-ம் நூற்றாண்டிலிருந்தான அரசியலமைப்பு விதியின் நீண்டகால விளக்கத்தை மாற்றக்கூடியதாகவும் இது கருதப்படுகிறது.

டிரம்ப் மீண்டும் ஜனாதிபதி பதவியேற்ற முதல் நாளான கடந்த ஆண்டு ஜனவரியில் அந்த ஆணை பிறப்பிக்கப்பட்டது.

பிறப்பு உரிமை குடியுரிமையைத் தடுக்கும் நீண்டகால அச்சுறுத்தலை நிறைவேற்றும் வகையில் இது குடியேற்றத்திற்கு எதிரான கடுமையான நடவடிக்கையின் ஒரு பகுதியென்று டிரம்ப் கூறினார்.

ஆனால் கீழ் நீதிமன்றங்கள் இந்த ஆணை அமெரிக்க அரசியலமைப்பை மீறுவதாக கருதி முன்னர் தடுத்தன என்பதும் குறிப்பிடத்தக்கது.

இதனால் முன்னாள் ஜனாதிபதிகளான ஜோ பிடன், பராக் ஒபாமாவால் நியமிக்கப்பட்டவர்கள் உட்பட அந்த நீதிமன்றத்தின் சில நீதிபதிகளையும் டிரம்ப் விமர்சித்தார்.

"அவர்களில் சிலரை எனக்கு பிடிக்கும், சிலரைப் பிடிக்கவில்லை" என்று உச்ச நீதிமன்ற நீதிபதிகளைக் குறித்து கூறிய டிரம்ப், பிடன், ஒபாமாவின் நியமனங்களை விமர்சித்தார்.

-சங்கீர்த்தனா