ஜப்பான் பள்ளியில் அதிர்ச்சி சம்பவம்: மதிய உணவால் 600க்கும் மேற்பட்ட மாணவர்கள் பாதிப்பு

டோக்கியோ:

ஜப்பானின் ஒசாகா பகுதியில் உள்ள குமாடோரி நகரில், பள்ளி மதிய உணவை உட்கொண்ட 600க்கும் மேற்பட்ட மாணவர்கள், ஊழியர்கள் உணவு நச்சுத்தன்மையால் பாதிக்கப்பட்டுள்ளனர். கடந்த வியாழக்கிழமை முதல் எட்டு தொடக்க, இடைநிலைப் பள்ளிகளைச் சேர்ந்தவர்களுக்கு வாந்தி, வயிற்றுப்போக்கு போன்ற உபாதைகள் ஏற்பட்டதாக ஜப்பானின் பொது ஊடகமான என்.எச்.கே செய்தி வெளியிட்டுள்ளது.

செவ்வாய்க்கிழமை நிலவரப்படி, பாதிக்கப்பட்டவர்களின் மொத்த எண்ணிக்கை 633 ஆக உயர்ந்துள்ளது.

உள்ளூர் சுகாதார மையங்கள் மேற்கொண்ட தீவிரப் பரிசோதனையில், உடல்நலம் பாதிக்கப்பட்ட சில மாணவர்களிடம் 'நோரோவைரஸ்' (Norovirus) தொற்று இருப்பது கண்டறியப்பட்டது. இந்த வைரஸ், அந்தப் பள்ளிகளுக்கு மதிய உணவிற்காக ரொட்டி விநியோகம் செய்த நிறுவனத்தின் ஊழியர்களிடமும் இருப்பது உறுதி செய்யப்பட்டுள்ளது. இதன் அடிப்படையில், பள்ளிகளுக்கு வழங்கப்பட்ட ரொட்டியே இந்த நச்சுத்தன்மைக்கு முதன்மைக் காரணம் எனப் பொதுச் சுகாதார அதிகாரிகள் அதிகாரப்பூர்வமாக அறிவித்துள்ளனர்.

இந்தக் கடுமையான விதிமீறலைத் தொடர்ந்து, சம்பந்தப்பட்ட ரொட்டி உற்பத்தி நிறுவனத்தின் செயல்பாடுகளை ஐந்து நாட்களுக்குத் தற்காலிகமாக நிறுத்தி வைக்க உத்தரவிடப்பட்டுள்ளது. 

இச்சம்பவம் ஜப்பான் கல்வித் துறையிலும், பெற்றோர் மத்தியிலும் பெரும் கவலையை ஏற்படுத்தியுள்ள நிலையில், பள்ளி உணவின் தரம் மற்றும் தூய்மையை உறுதி செய்யக் கூடுதல் நடவடிக்கைகள் எடுக்கப்பட்டு வருகின்றன.

குமாடோரி நகர நிர்வாகம், பாதிக்கப்பட்ட மாணவர்களின் உடல்நிலையைத் தொடர்ந்து கண்காணித்து வருவதோடு, மற்ற பள்ளிகளிலும் இதுபோன்ற பாதிப்புகள் ஏற்படாமல் இருக்க முன்னெச்சரிக்கை நடவடிக்கைகளைத் தீவிரப்படுத்தியுள்ளது. மதிய உணவு வழங்கும் அனைத்து நிறுவனங்களும் இனிவரும் காலங்களில் கடுமையான சுகாதார நெறிமுறைகளைப் பின்பற்ற வேண்டும் என அறிவுறுத்தப்பட்டுள்ளது.

-கிரித்திக்கா