மேற்கு ஆசிய பதற்றம்: ஈரான் பயணிகளைத் தற்காலிகமாகத் தடை செய்த ஆஸ்திரேலியா

சிட்னி:

மேற்கு ஆசியாவில் நிலவும் மோதல் காரணமாக, ஈரான் நாட்டைச் சேர்ந்தவர்களின் நுழைவை ஆஸ்திரேலியா தற்காலிகமாகத் தடை செய்துள்ளது. 

அடுத்த ஆறு மாதங்களுக்கு, ஈரான் கடவுச்சீட்டு வைத்துள்ளவர்கள் சுற்றுலா அல்லது வேலை நோக்கில் நாட்டிற்குள் அனுமதிக்கப்படமாட்டார்கள் என உள்துறை துறை அறிவித்துள்ளது.

இந்த முடிவு, குறுகிய கால விசாவில் வரும் சிலர் காலாவதியான பின்னரும் நாடு விட்டு வெளியேறாமல் இருப்பார்களெனும் அச்சத்தின் அடிப்படையில் எடுக்கப்பட்டதாக தெரிவிக்கப்பட்டுள்ளது. இருப்பினும், ஆஸ்திரேலிய குடிமக்களின் பெற்றோர் போன்ற சில குறிப்பிட்ட சூழல்களில் விதிவிலக்குகள் பரிசீலிக்கப்படும்.

உள்துறை அமைச்சர் டோனி பர்க், ஈரான் மோதலுக்கு முன் வழங்கப்பட்ட பல விசாக்கள் தற்போது வழங்கப்பட்டிருக்க வாய்ப்பில்லை எனக் குறிப்பிட்டார். நிரந்தர குடியேற்றம் அரசின் திட்டமிட்ட முடிவாக இருக்க வேண்டும் என்றும், சீரற்ற சூழ்நிலைகளால் தீர்மானிக்கப்படக்கூடாது என்றும் அவர் தெரிவித்தார்.

ஆஸ்திரேலியாவில் 85,000க்கும் மேற்பட்ட ஈரான் வம்சாவளி மக்கள் வசித்து வருகின்றனர். இதற்கிடையில், பெண்கள் கால்பந்து அணியினருக்கு தஞ்சம் வழங்கிய ஆஸ்திரேலியாவின் முடிவு ஈரானில் எதிர்ப்பை ஏற்படுத்தியது. 

தேசிய கீதத்தைப் பாட மறுத்த அந்த வீராங்கனைகள் தங்கள் நாட்டில் துரோகிகளாக குற்றம்சாட்டப்பட்ட நிலையில், சிலர் பின்னர் தஞ்ச கோரிக்கையை வாபஸ் பெற்றது புதிய சந்தேகங்களை எழுப்பியுள்ளது.

-கிரித்திக்கா