எண்ணெய் மையங்களை குறிவைக்கும் தாக்குதலா?: புஜைராவில் பெரும் புகைமூட்டம்

துபாய்:

ஐக்கிய அரபு அமீரகத்தின் புஜைரா பகுதியில் உள்ள முக்கிய சக்தி, எண்ணெய் வசதிகளின் அருகில் நேற்று தடித்த கருப்பு புகை எழுந்தது. இந்த சம்பவம், வளைகுடா பகுதியில் எண்ணெய் தொடர்பான அமைப்புகளை குறிவைத்து புதிய தாக்குதல் நடந்திருக்கலாம் என்ற சந்தேகத்தை எழுப்பியுள்ளது.

புஜைரா துறைமுகம் முக்கியமான எண்ணெய் சேமிப்பு, வர்த்தக மையமாக இருப்பதுடன், முன்பும் தாக்குதல்களுக்கு இலக்காக இருந்தது. அங்குள்ள அதிகாரிகள் வெளியிட்ட தகவலின்படி, தடுக்கப்பட்ட ட்ரோனின் சிதறல்கள் கீழே விழுந்ததால் தீப்பற்றியது. ஆனால் தீ ஏற்பட்ட துல்லியமான இடம் குறித்து அதிகாரப்பூர்வமாக தெரிவிக்கப்படவில்லை.

இந்த சம்பவம், அமெரிக்க அதிபர் டொனால்ட் டிரம்ப், ஈரானின் முக்கிய எண்ணெய் ஏற்றுமதி மையமான கார்க் தீவை அமெரிக்க படைகள் தாக்கியதாக அறிவித்த சில மணி நேரங்களுக்குப் பிறகு நடந்தது. அந்த தீவு ஈரானின் பெரும்பாலான மூல எண்ணெய் ஏற்றுமதியை மேற்கொள்ளும் முக்கிய மையமாகக் கருதப்படுகிறது.

இரவு நேரம் வரை தீ அணைக்கும் பணிகள் தொடர்ந்து நடைபெற்று வந்ததாக அதிகாரிகள் தெரிவித்தனர். 

மேலும், இந்த சம்பவத்தில் ஜோர்டான் நாட்டைச் சேர்ந்த ஒருவர் காயமடைந்ததாகவும் கூறப்பட்டது. இதற்கு முன்பும் மாதத்தின் தொடக்கத்தில் புஜைராவில் சக்தி அமைப்புகளை குறிவைத்து ட்ரோன் தாக்குதல் நடந்ததாக தகவல்கள் வெளியாகியிருந்தன.

-கிரித்திக்கா