புதிய பெயர் பெறும் புக்கிட் ஜாலில் தேசிய விளையாட்டரங்கம்

பெட்டாலிங் ஜெயா: 

புக்கிட் ஜாலில் தேசிய விளையாட்டரங்கம் இனி 'டிஎம்’ (TM) தேசிய விளையாட்டரங்கம்' என்று அழைக்கப்படும். மலேசிய விளையாட்டரங்கக் கழகத்திற்கும், டெலிகோம் மலேசியா (Telekom Malaysia) நிறுவனத்திற்கும் இடையே மேற்கொள்ளப்பட்டுள்ள மூன்று ஆண்டுகால கூட்டாண்மை ஒப்பந்தத்தைத் தொடர்ந்து இந்தப் பெயர் மாற்றம் செய்யப்பட்டுள்ளது.

இதே ஒப்பந்தத்தின் கீழ், புகழ்பெற்ற புத்ரா உள்விளையாட்டரங்கமும் இனி 'யூனிஃபை அரினா' (Unifi Arena) என மறுபெயரிடப்பட்டுள்ளது. இந்த நடவடிக்கையானது விளையாட்டரங்கின் வசதிகளை மேம்படுத்தவும், உலகத்தரம் வாய்ந்த விளையாட்டு, பொழுதுபோக்கு நிகழ்ச்சிகளைத் தொடர்ந்து நடத்துவதற்குத் தேவையான நிதி நிலையை உறுதிப்படுத்தவும் உதவும் என்று விளையாட்டரங்கக் கழகம் தெரிவித்துள்ளது.

விளையாட்டரங்கப் பராமரிப்புச் செலவுகளைச் சமாளிக்கவும், வருமானத்தை ஈட்டவும் இத்தகைய பெயர் மாற்றங்கள் அவசியமானவை என்று முன்னதாகத் தெரிவிக்கப்பட்டிருந்தது. 

இதன் ஒரு பகுதியாகவே இந்த ஒப்பந்தம் கையெழுத்தாகியுள்ளது. ஏற்கனவே 2017-ஆம் ஆண்டில் புத்ரா உள்விளையாட்டரங்கம், அக்ஸியாதா நிறுவனத்துடனான ஒப்பந்தத்தின் மூலம் 'அக்ஸியாதா அரினா' என அழைக்கப்பட்டிருந்தது குறிப்பிடத்தக்கது.

இந்த புதிய மாற்றத்தின் மூலம் தேசிய விளையாட்டரங்க வளாகம் நவீனமயமாக்கப்படுவதோடு, நாட்டின் விளையாட்டுத் துறைக்கும் கூடுதல் பலம் சேர்க்கும் என எதிர்பார்க்கப்படுகிறது.

-கிரித்திக்கா