அரசியல் சூழ்ச்சியா? அல்லது சாதாரண சந்திப்பா?: பாங்காக் பயணத்தின் பின்னணியை உடைக்கும் தக்கியுதீன் ஹாசன்

கோத்தா பாரு:

தாய்லாந்து தலைநகர் பாங்காக்கில், அம்னோ தலைவர் டத்தோ ஸ்ரீ டாக்டர் அஹமத் ஜாஹிட் ஹமிடி, எதிர்க்கட்சித் தலைவர் டத்தோ ஸ்ரீ ஹம்சா சைனுடின் ஆகியோரைச் சந்தித்ததை மலேசிய இஸ்லாம் கட்சியின் (PAS) பொதுச் செயலாளர் தகியுதீன் ஹாசன் உறுதிப்படுத்தியுள்ளார். 

இந்தச் சந்திப்பு மலேசிய இஸ்லாம் கட்சியின் தலைவர் டான் ஸ்ரீ அப்துல் ஹாடி அவாங்கின் முழு அனுமதியுடனேயே நடைபெற்றதாக அவர் குறிப்பிட்டார்.

இந்தச் சந்திப்பானது சில தரப்பினர் கூறுவது போல அரசாங்கத்தைக் கவிழ்க்கும் 'பாங்காக் மூவ்' போன்ற எந்தவொரு ரகசியத் திட்டமும் கொண்டிருக்கவில்லை என்றும், அது வெறும் சாதாரணக் கருத்துப் பரிமாற்றத்திற்காக மட்டுமே அமைந்தது என்றும் அவர் தெளிவுபடுத்தினார். 

தென்கிழக்கு ஆசிய விளையாட்டுப் போட்டிகளின் போது எதேச்சையாக இந்தச் சந்திப்பு நிகழ்ந்ததாகவும், இதில் முறையான அரசியல் உள்நோக்கம் எதுவுமில்லை என்றும் அவர் தெரிவித்தார்.

முன்னதாக, மலாய், இஸ்லாமியக் கட்சிகளை ஒன்றிணைப்பது குறித்துப் பேசுவதற்காக இந்தச் சந்திப்பு நடைபெற்றதாக ஊடகங்கள் செய்தி வெளியிட்டிருந்தன.

இச்சம்பவம் குறித்து கோத்தா பாருவில் செய்தியாளர்களிடம் பேசிய தக்கியுடின் ஹாசன், தன் மீதான குற்றச்சாட்டுகள் வெறும் ஊகங்கள் மட்டுமே என்றும், கட்சித் தலைவருக்குத் தெரியாமல் எந்தவொரு ரகசிய நடவடிக்கையிலும் தாம் ஈடுபடவில்லை என்றும் திட்டவட்டமாகக் கூறினார்.

-கிரித்திக்கா