“நான் முடிக்க சொன்னால் போர் முடியும்” – ஈரான் குறித்து டிரம்ப் பரபரப்பு கருத்து

வாஷிங்டன்: 

அமெரிக்கா–இஸ்ரேல், ஈரான் இடையிலான போர் விரைவில் முடிவுக்கு வரும், ஏனெனில் அந்த நாட்டில் தாக்குவதற்கு கிட்டத்தட்ட இலக்குகள் இல்லை என்று அமெரிக்க அதிபர் டொனால்ட் டிரம்ப் கூறியதாக சின்ஹுவா செய்தி நிறுவனம் தெரிவித்துள்ளது.

“சில இடங்களில் மட்டும்... நான் எப்போது அதை முடிக்க விரும்புகிறேனோ அப்போது அது முடிந்து விடும்,” என்று டிரம்ப் புதன்கிழமை ஐந்து நிமிட தொலைபேசி பேட்டியில் அமெரிக்க ஆன்லைன் செய்தித் தளம் ஆக்சியோஸிடம் தெரிவித்தார்.

மேலும், மேற்கு ஆசியாவின் பல நாடுகளில் உள்ள அமெரிக்க சொத்துகளை இலக்காகக் கொண்ட தாக்குதலுக்கு பிறகு, ஈரான் “இது போன்ற செயல்களில் இருந்து எளிதாக தப்பிக்க முடியாது” என்றும் அவர் கூறினார்.

அமெரிக்க, இஸ்ரேல் அதிகாரிகள் ஈரானில் குறைந்தது இன்னும் இரண்டு வாரங்கள் தாக்குதல்கள் நடைபெறலாம் எனத் தயாராகி வருகின்றனர். மேலும், போராட்டம் எப்போது நிறுத்தப்படும் என்பது குறித்து இதுவரை எந்த உள்துறை உத்தரவும் வழங்கப்படவில்லை என்று ஆக்சியோஸ் செய்தி வெளியிட்டுள்ளது.

 “எங்கள் அனைத்து நோக்கங்களையும் அடைந்து இந்தப் போராட்டத்தில் முழுமையாக வெற்றி பெறும் வரை, தேவையான அளவு காலவரம்பின்றி இந்தப் போர் தொடரும்” என்று இஸ்ரேல் பாதுகாப்பு அமைச்சர் இஸ்ரேல் காட்ஸ் புதன்கிழமை தெரிவித்துள்ளார்.

இதையடுத்து, ஈரானின் இஸ்லாமிய புரட்சிக் காவல் படை (IRGC) கடற்படை புதன்கிழமை காலை முதல் ஹோர்மூஸ் நீரிணையில் இரண்டு கப்பல்களை இலக்காகக் கொண்டு தாக்குதல் நடத்தியதாக அதன் பொது தொடர்புத் துறை வெளியிட்ட அறிக்கையில் தெரிவிக்கப்பட்டுள்ளது.

அதே நேரத்தில், தாய்லாந்து நாட்டைச் சேர்ந்த ஒரு கப்பல் உட்பட குறைந்தது மூன்று கப்பல்கள், அந்த நீரிணை வழியாக சென்றபோது “அடையாளம் தெரியாத” ஏவுகணை போன்ற பொருளால் தாக்கப்பட்டதாக தகவல்கள் கூறுகின்றன.

செவ்வாய்க்கிழமை இரவு அமெரிக்க படைகள் ஈரானில் உள்ள “பெரிய பாலிஸ்டிக் ஏவுகணை தயாரிப்பு நிலையம்” ஒன்றை தாக்கின என அமெரிக்க மத்திய கட்டளைத் தளபதி பிராட் கூப்பர் தெரிவித்தார்.

“ஈரானின் ஏவுகணைகள், ட்ரோன்களை இலக்காகக் கொண்டு, அதே நேரத்தில் அவர்களின் பாதுகாப்பு தொழில் தளங்களையும் தாக்குவதன் மூலம் நாங்கள் முறையாக அவற்றை செயலிழக்கச் செய்து வருகிறோம்,” என்று கூப்பர் ‘X’ தளத்தில் தெரிவித்தார்.

“நேற்று இரவு மட்டும் எங்கள் குண்டுவீச்சு விமானங்கள் ஒரு பெரிய பாலிஸ்டிக் ஏவுகணை தயாரிப்பு நிலையத்தை தாக்கின,” என்றும் அவர் கூறினார்.

அமெரிக்கா, இஸ்ரேல் 28 பிப்ரவரி அன்று ஈரானுக்கு எதிராக பெரிய அளவிலான தாக்குதலைத் தொடங்கியதிலிருந்து, ஈரான் முழுவதும் 5,500-க்கும் மேற்பட்ட இலக்குகளை, அதில் 60-க்கும் மேற்பட்ட கப்பல்களையும், அமெரிக்க படைகள் தாக்கியுள்ளதாக அந்த தளபதி தெரிவித்தார்.

-சங்கீர்த்தனா