அந்நியத் தொழிலாளர்களை நேரடியாக பெறுவதற்கான மனிதவள அமைச்சின் புதிய வழிமுறையை மலேசிய முதலாளிகள் கூட்டமைப்பு வரவேற்கிறது: சைட் ஹுசைன்

கோலாலம்பூர்:

அந்நியத் தொழிலாளர்களை நேரடியாக பெறுவதற்கான மனிதவள அமைச்சின் புதிய வழிமுறையை மலேசிய முதலாளிகள் கூட்டமைப்பு வரவேற்கிறது.

அக்கூட்டமைப்பின் தலைவர்  டத்தோ டாக்டர் சைட் ஹுசைன் சைட் உஸ்மான் இதனை கூறினார்.

உள்ளூர் முதலாளிகள் இடைத்தரகர்களை நம்பாமல் அந்நியத் தொழிலாளர்களை நேரடியாக வேலைக்கு அமர்த்த அனுமதிக்கும் ஒரு புதிய வழிமுறையை மனிதவள அமைச்சு அறிமுகப்படுத்தியுள்ளது.

இது அதிகப்படியான ஆட்சேர்ப்பு செலவுகளைக் குறைப்பதற்கும் வெளிப்படைத்தன்மை, சுரண்டல் பிரச்சினைகளைத் தீர்ப்பதற்கும் ஒரு சிறந்த நடவடிக்கையாகும்.

பல வெளிநாட்டு தூதரகங்களுடனான கலந்துரையாடல்கள் மிகவும் பயனுள்ள, நெறிமுறை மற்றும் செலவு குறைந்த ஆட்சேர்ப்பு கட்டமைப்பை உருவாக்க வேண்டியதன் அவசியம் குறித்து பரந்த உடன்பாடு இருப்பதைக் காட்டுகின்றன.

அவரைப் பொறுத்தவரை, பெரும்பாலும் செலவுகளை அதிகரிக்கும் இடைத்தரகர்களின் பங்கை அகற்றுவதற்கும், வெளிநாட்டு தொழிலாளர்கள் மலேசியாவிற்கு வருவதற்கு முன்பு வேலைவாய்ப்பு விதிமுறைகள் மற்றும் நிபந்தனைகளைப் புரிந்துகொண்டு ஒப்புக்கொள்வதை உறுதி செய்வதற்கும் இந்த அணுகுமுறை முக்கியமானது.

நாட்டின் பொருளாதாரத்தை ஆதரிப்பதில் அந்நியத் தொழிலாளர்கள் ஒரு முக்கிய அங்கமாகவே உள்ளனர்,

குறிப்பாக உள்ளூர் பணியாளர் பங்கேற்பு இன்னும் இல்லாத துறைகளும் உள்ளன.

இலக்கவியல் சரிபார்ப்பு, பாதுகாப்பான கட்டண வழிமுறைகள் உள்ளிட்ட தொழில்நுட்பத்தால் ஆதரிக்கப்படும் முன்மொழியப்பட்ட அரசாங்க மாதிரி, பங்குதாரர்களுடன் கலந்தாலோசித்து செயல்படுத்தப்பட்டால், நாட்டின் தொழிலாளர் நிர்வாகத்தை மேம்படுத்த முடியும்.

இந்த முயற்சி நிலையானது, வெளிப்படையானது.  சர்வதேச சிறந்த நடைமுறைகளுக்கு ஏற்ப இருப்பதை உறுதி செய்வதற்காக மனிதவள அமைச்சு, உள்துறை அமைச்சு தொடர்புடைய தரப்பினருடன் நெருக்கமாக பணியாற்ற மலேசிய முதலாளிகள் கூட்டமைப்பு  தயாராக உள்ளது என்று அவர் கூறினார்.

- பார்த்திபன் நாகராஜன்