இந்திய மாணவர்களுக்கான மெட்ரிகுலேசன் விவகாரத்தில் வெளிப்படைத்தன்மை இல்லை; கல்வியமைச்சருக்கு டத்தோஶ்ரீ சரவணன் கடிதம்: நூருல் இசாவுக்கு முதல் சோதனையாக அமையலாம்

கோலாலம்பூர்:

இந்திய மாணவர்களுக்கான மெட்ரிகுலேசன் இடங்கள் தொடர்பில் கல்வியமைச்சர் ஃபட்லினா சிடேக்கிற்கு மஇகா துணைத் தலைவர் டத்தோஶ்ரீ எம். சரவணன் கடிதம் எழுதியுள்ளார்.

இந்த ஆண்டு மெட்ரிகுலேஷன் கல்வி வாய்ப்புக்கு விண்ணப்பித்த, வழங்கப்பட்ட இந்திய மாணவர்களின் எண்ணிக்கையை கல்வியமைச்சு விரிவாக விவரிக்க வேண்டும்.

இது தொடர்பில் மஇகா சார்பில் அவர் கல்வியமைச்சருக்கு இக் கடிதத்தை எழுதியுள்ளார்.

மேலும் மலேசிய இந்திய சமூகத்தின் உரிமைகளைப் பாதுகாக்கப்படும் என்று கெஅடிலான் துணைத் தலைவர் வேட்பாளர் நூருல் இசா  பகிரங்கமாக உறுதியளித்துள்ளார்.

அவ் வகையில் இந்த விவகாரம் நூருல் இசாவுக்கு முதல் சோதனையாக அமையலாம்.

நீண்டகால பிரச்சினைகளை சரி செய்வதாக சபதம் எடுத்துள்ள நிலையில் நூருல் இசா மெட்ரிகுலேஷன் பிரச்சினைக்கு தீர்வு காண ஒரு முக்கியமான வாய்ப்பை வழங்குகிறது.

இந்திய மாணவர்களிடமிருந்து அவர்களின் மெட்ரிகுலேஷன் விண்ணப்பங்கள் நிராகரிக்கப்பட்டதாக ஏராளமான புகார்கள் வந்ததற்கு பதிலளிக்கும் விதமாக டத்தோஶ்ரீ சரவணனின் கடிதம் அமைந்துள்ளது.

மெட்ரிகுலேஷன் திட்டத்தில் மிகப் பெரிய தெளிவின்மை உள்ளது. குறிப்பாக எத்தனை இடங்கள் வழங்கப்பட்டன. எத்தனை மாணவர்கள் ஏற்றுக்கொள்ளப்பட்டனர். எத்தனை நிராகரிக்கப்பட்டன என்பது வெளிப்படையாக இல்லை.

இந்த வெளிப்படைத்தன்மை இல்லாதது இந்திய சமூகத்திலிருந்து ஏராளமான புகார்களுக்கு வழிவகுத்தது.

இந்த மாணவர்களில் பலர் குறைந்த வருமானம் கொண்ட பி40 சூழலில் இருந்து வருகிறார்கள். அங்கு கல்வி மட்டுமே வறுமையிலிருந்து வெளியேறுவதற்கான ஒரே வழி என்பதை நினைவில் கொள்வது அவசியம்.

இந்த நிலைமை தொடர்புடைய அமைச்சின் வெளிப்படைத்தன்மை இல்லாதது குறித்த சமூகத்தின் கவலைகளை எடுத்துக்காட்டுகிறது.

இதனை அடிப்படையாக கொண்ட டத்தோஶ்ரீ சரவணனின் கடிதம் இன்று மதியம் புத்ராஜெயாவில் உள்ள கல்வியமைச்சிடம் சமர்ப்பிக்கப்பட்டுள்ளது.

முன்னாள் பிரதமர் டத்தோ நஜிப்  2018இல் இந்திய மாணவர்களுக்கு கூடுதலாக 700 மெட்ரிகுலேஷன் இடங்களை அறிவித்ததாகவும், இதனால் மொத்தம் 2,200 இடங்கள் கிடைத்தது.

ஆனால் தற்போது  பல மாணவர்கள் எங்களிடம் வந்து தங்கள் விண்ணப்பங்கள் தோல்வியடைந்ததாக புகார் தெரிவித்திருப்பதாக தாப்பா நாடாளுமன்ற உறுப்பினருமான டத்தோஶ்ரீ சரவணன் அக் கடிதத்தில் குறிப்பிட்டிருந்தார்.

- பார்த்திபன் நாகராஜன்