எஸ்பிஎம் தேர்வு டிசம்பர் 2-ஆம் தேதி தொடங்கி பிப்ரவரி 6-ஆம் தேதி வரை நடைபெறும்: கல்வி அமைச்சகம் தகவல் 

கோலாலம்பூர்: 

இவ்வாண்டுக்கான எஸ்பிஎம் தேர்வு டிசம்பர் 2-ஆம் தேதி தொடங்கி பிப்ரவரி 6-ஆம் தேதி வரை நடைபெறும் என்று கல்வி அமைச்சகம் அறிவித்துள்ளது. 

இம்முறை மொத்தம்  402,956 பேர் எஸ்பிஎம் தேர்வினை  நாடு முழுவதும் 3,337 தேர்வு மையங்களில் எழுதவுள்ளனர் என்று கல்வி அமைச்சகம் ஓர் அறிக்கையில் வெளியிட்டுள்ளது. 

மலாய் மொழி பாடத்திற்கான வாய்மொழி சோதனை டிசம்பர் 2-ஆம் தேதி தொடங்கி டிசம்பர் 5-ஆம் தேதி நடைபெறவுள்ள நிலையில் டிசம்பர் 9, 10, 12-ஆம் தேதிகளில் செய்முறை அறிவியல் தேர்வுகள் நடைபெறவுள்ளன.

இதனை தொடர்ந்து, ஆங்கில மொழி பாடத்திற்கான வாய்மொழி சோதனை டிசம்பர் 16, 17, 18, 19 ஆகிய தேதிகளில் நடைபெறும். 

அதுமட்டுமல்லாமல், மலாய், ஆங்கில மொழிகளுக்கான கேட்கும் தேர்வு டிசம்பர் 31-ஆம் தேதி நடைபெறவுள்ளது. 

எஸ்பிஎம் தேர்வு எழுதுவோர் தேர்வுக்கான தேதி, நேரம், குறியீடு மற்றும் தேர்வுத் தாள் பற்றிய தகவல்களைப் பெற தேர்வு கால அட்டவணையைப் பார்க்குமாறு கல்வியமைச்சகம் நினைவூட்டியது. 

- அஸ்வினி செந்தாமரை