டிசம்பர் 21 முதல் தினசரி சென்னை - பினாங்கு இடையே  விமான சேவையை அறிமுகப்படுத்தும் இண்டிகோ 

கோலாலம்பூர்:

சென்னைக்கும், பினாங்கு நகருக்கும் இடையே நேரடி விமான சேவையை டிசம்பர் 21ஆம் தேதி முதல் தொடங்கும் என்று இந்தியாவின் மிகப்பெரிய விமான நிறுவனமான இண்டிகோ தெரிவித்துள்ளது.

கோவிட்-19 காலக்கட்டத்திற்குப் பிறகு உலகம் முழுவதும் சுற்றுலா செல்பவர்களின் எண்ணிக்கை கணிசமாக அதிகரித்துள்ளது.

இதனால் பல விமான நிறுவனங்கள் பல புதிய நகரங்களுக்கு தங்கள் சேவையைத் தொடங்கியுள்ளன.

இந்நிலையில் சென்னைக்கும், மலேசியாவில் உள்ள பினாங் நகருக்கும் இடையே நேரடி விமான சேவையை டிசம்பர் 21ஆம் தேதி முதல் தொடங்கும் என்று இந்தியாவின் மிகப்பெரிய விமான நிறுவனமான இண்டிகோ தெரிவித்துள்ளது. 

ஏற்கெனவே மலேசியாவின் இரு நகரங்களுக்கு நேரடி விமான சேவை உள்ள நிலையில் மூன்றாவது நகரமாக பினாங்கை இணைத்துள்ளது இண்டிகோ. 

இந்த நேரடி விமானங்கள் சுற்றுலாவை மேம்படுத்துவதோடு மட்டுமல்லாமல் வர்த்தக உறவுகளையும் மேம்படுத்தும் என்று விமான நிறுவனம் வலியுறுத்தியுள்ளது.

இண்டிகோ விமான நிறுவனம் ஏற்கனவே தென்கிழக்கு ஆசிய நாடான மலேசியாவின் கோலாலம்பூர், லங்காவி நகரங்கள் மற்றும் சென்னைக்கு இடையே நேரடி விமானங்களை இயக்கி வருவது குறிப்பிடத்தக்கது.

- பார்த்திபன் நாகராஜன்