திருமலையில் ஹிந்துக்கள் மட்டும்: வக்பு வாரியத்தில் முஸ்லிம் அல்லாதவர்கள் : ஒவைசி விமர்சனம்

ஹைதராபாத்:

திருமலையில் ஹிந்துக்கள் மட்டுமே பணிபுரிய வேண்டும்; ஆனால், வஃக்ப் வாரியத்தில் மட்டும் முஸ்லிம் அல்லாதோரை நியமிக்க மத்திய அரசு விரும்புகிறது எந்த வகையில் நியாயம் என்று அகில இந்திய மஜ்லீஸ் கட்சி தலைவர் அசாதுதீன் ஒவைசி விமர்சித்தார்.

திருமலையில் ஹிந்துக்கள் மட்டுமே பணிபுரிய வேண்டும் என்று திருப்பதி தேவஸ்தானத்தின் புதிய தலைவர் பி.ஆர்.நாயுடு  கூறினார்.

இதுகுறித்து ஒவைசி தனது எக்ஸ் பதிவில், பெரும்பாலான ஹிந்து அறநிலையச் சட்டங்கள் ஹிந்துக்கள் மட்டுமே அதன் உறுப்பினர்களாக இருக்க வேண்டும் என்று வலியுறுத்துகின்றன.

ஆனால், வக்பு வாரியத்தில் மட்டும் முஸ்லிம் அல்லாதோரை நியமிக்க பிரதமர் மோடி தலைமையிலான தேசிய ஜனநாயக கூட்டணி அரசு விரும்புகிறது. ஒருதரப்பினருக்கு நியாயமானது மற்றொரு தரப்பினருக்கும் நியாயமாக இருக்க வேண்டும் அல்லவா? என குறிப்பிட்டுள்ளார்.

- ஆர்யன்