அமெரிக்க அதிபர் தேர்தலுக்கு பின் தங்கத்தின் விலை சீராக நிலை நிறுத்தப்பட வேண்டும்: டத்தோ அப்துல் ரசூல்

கோலாலம்பூர்:

அமெரிக்க அதிபர் தேர்தலுக்கு பின் தங்கத்தின் விலை சீராக நிலை நிறுத்தப்பட வேண்டும்.

இது தான் உலகளாவிய தங்க வியாபாரிகளின் எதிர்பார்ப்பாக உள்ளது என்று மலேசிய இந்தியர் பொற்கொல்லர், நகை வணிகர்கள் சங்கத்தின் தலைவர் டத்தோ ஹாஜி அப்துல் ரசூல்  கூறினார்.

தங்கத்தின் விலை உலகளாவிய நிலையில் தினந்தோறும் பலமடங்கு உயர்ந்து வருகிறது.

இதற்கு உலக அளவில் நடக்கும் போர்கள் முக்கிய காரணமாக உள்ளது.

அதே வேளையில் நிலைத் தன்மை இல்லாத அரசியல் சூழ்நிலை, அமெரிக்க டாலரின் மதிப்பு ஆகியவையும் இதற்கு முக்கிய காரணமாக உள்ளது.

இந்நிலையில் அமெரிக்க அதிபர் தேர்தலும் இதற்கு ஒரு அளவுகோலாக பார்க்கப்படுகிறது. 

இந்த தேர்தலில் டோனல்டு டிராம்பும் கமலா ஹரிசும் போட்டியிடுகின்றனர்.

இதில் யார் வெற்றி பெற்றாலும் உலகளவில் நடக்கும் யுத்தப்  பிரச்சினைகளுக்கு ஒரு முற்றுப்புள்ளி வைக்க வேண்டும்.

இதன் மூலம் தங்கத்தின் விலை சீராகும். குறிப்பாக தங்க வணிகமும் பரவலாக அதிகரிக்கும்.

ஆகவே அமெரிக்காவில் யார் தலைமையேற்றாலும் இந்த விவகாரத்திற்கு முன்னுரிமை வழங்க வேண்டும்.

இது தான் உலக அளவில் உள்ள தங்க வணிகர்களின் எதிர்பார்ப்பாக உள்ளது என்று டத்தோ ஹாஜி அப்துல் ரசூல் கூறினார்.

இதனிடையே தங்கத்தின் விலை அதிகரித்தால் வணிகர்களுக்கு நல்லது என்று கூறுகின்றனர். இதில் எந்த உண்மையும் இல்லை. 

தங்கத்தின் விலை உயர்ந்தால் வாங்கும் சக்தி குறைந்து விடும். வாங்கும் சக்தி இல்லை என்றால் வணிகம் எப்படி நடக்கும்? என்று அவர் கேள்வி எழுப்பினார்.

ஆக தங்கத்தின் விலை உயர்வு வணிகர்களுக்கு பாதிப்பு தான் என்று அவர் செய்தியாளர்களிடம் சுட்டிக்காட்டினார். 

- பார்த்திபன் நாகராஜன்