மலேசியாவில் ரோஹின்யா அகதிகளுக்கான நடமாட்டக் கட்டுப்பாடுகள் குறித்து அரசு பரிசீலித்து வருகிறது: ஜாஹித்

கோலாலம்பூர்:

நாட்டில் ரோஹின்யா அகதிகளுக்கு நடமாட்டக் கட்டுப்பாடுகளை அமல்படுத்துவதன் பொருத்தத்தை அரசு ஆராய்ந்து வருகிறது.

துணைப் பிரதமர் டத்தோஶ்ரீ டாக்டர் அஹ்மத் ஜாஹித் ஹமிடி இதனை கூறினார்.

இந்த அமலாக்கம் தொடர்பான முடிவு, தேசியப் பாதுகாப்பு, இறையாண்மை, மனித உரிமைகளின் நலன்களைக் கருத்தில் கொண்டு எடுக்கப்பட்டுள்ளது.

மேலும், நாடு தழுவிய ரோஹின்யா அகதிகள் சமூகத்திற்கான தரவு சேகரிப்பு செயல்முறை, குடிநுழைவு தடுப்பு முகாமில் உள்ள நபர்களை உள்ளடக்கிய முதல் கட்டத்தில் தற்போது நடைபெற்று வருகிறது.

அகதிகள் பதிவு ஆவண திட்டத்தின் மூலமான இந்த முயற்சி, விரைவில் இரண்டாம் கட்டத்திற்கு நகரும் என்று எதிர்பார்க்கப்படுவதாக அவர் தெரிவித்தார்.

அகதிகள் பதிவு ஆவண திட்டத்தின் இரண்டாம் கட்டச் செயலாக்கம், குடிநுழைவு தடுப்பு முகாமிற்கு வெளியே உள்ள ஐக்கிய நாடுகள் அகதிகள் உயர் ஆணையர் அட்டைதாரர்கள் மீது கவனம் செலுத்தும்.

தேசியப் பாதுகாப்பு மன்றம், பிரதமரின் அலுவலகம், தொடர்புடைய அனைத்து அமைச்சகங்கள், துறைகள் மற்றும் முகமைகள், அத்துடன் உள்ளாட்சி அமைப்புகளுடன் இணைந்து, இந்த நோக்கத்திற்காகக் கலந்துரையாடல் அமர்வுகளைத் தீவிரமாக நடத்தி வருகின்றன.

நாட்டில் இந்தக் குழுவினர் சம்பந்தப்பட்ட பிரச்சினைகளை ஒருங்கிணைப்பதற்கான கருத்துக்களைப் பெறுவதற்கும், பொருத்தமான நடவடிக்கைகளைத் திட்டமிடுவதற்கும் இந்தக் கலந்துரையாடல் நடத்தப்பட்டது என்று அவர் இன்று நாடாளுமன்ற இணையதளத்தில் வெளியிடப்பட்ட எழுத்துப்பூர்வ பதிலில் கூறினார்.

- பார்த்திபன் நாகராஜன்