86 கடைகளுடன் ஈப்போ லிட்டில் இந்தியாவில் களை கட்டியது  தீபாவளி சந்தை

ஈப்போ:

கிட்டத்தட்ட 86 கடைகளுடன் ஈப்போ லிட்டில் இந்தியாவில்  தீபாவளி சந்தை களை கட்டியுள்ளது.

ஈப்போ லிட்டில் இந்திய வர்த்தக சங்கத்தின் தலைவர் ஜீவ கிருஷ்ணன் இதனை கூறினார்.

ஈப்போ இந்திய வர்த்தக சங்கத்தின் ஏற்பாட்டில், இவ்வாண்டுக்கான தீபாவளிச் சந்தை அக்டோபர் 24ஆம் தேதி முதல் நவம்பர் 7ஆம் தேதி வரை 15 நாட்களுக்கு நடைபெறுகிறது.

இவ்வாண்டு தீபாவளிச் சந்தையில் சுமார் 86 கடைகள் அமைக்கப்பட்டுள்ளது.

வழக்கமான வர்த்தகர்களும் இச்சந்தையில் பங்கேற்று வியாபார நடவடிக்கைகளை மேற்கொண்டு வருவதாக அவர் குறிப்பிட்டார்.

மேலும், இவ்வாண்டு தீபாவளிச் சந்தையைச் சிறப்பாக நடத்துவதற்காகப் பல்வேறு வசதிகள் ஏற்பாடு செய்யப்பட்டுள்ளது.

குறிப்பாக, வாகன நிறுத்தப் பிரச்சினைக்குத் தீர்வு காணும் வகையில், வர்த்தக சங்கத்தின் பின்புறத்தில் சுமார் 200 முதல் 300 கார்கள் வரை நிறுத்தக்கூடிய தனியார் வாகன நிறுத்துமிட வசதி ஏற்பாடு செய்யப்பட்டுள்ளதாகத் தெரிவித்தார். 

இதன் மூலம் சந்தைக்கு வருகை தரும் பொதுமக்கள் தங்களது வாகனங்களைச் சிரமமின்றி நிறுத்த முடியும் என எதிர்பார்ப்பதாகவும் கூறினார்.

அதேபோல் பொதுமக்களின் வசதியைக் கருத்தில் கொண்டு அமைச்சர் வோங் கா வோ மூலமாகப் புதிய கழிப்பறை வசதியும் ஏற்படுத்தப்பட்டுள்ளதாக அவர் தெரிவித்தார்.

எனவே, இவ்வாண்டு தீபாவளிச் சந்தைக்கு வருகை தந்து, அங்குள்ள வர்த்தகர்களுக்கு ஆதரவு அளிப்பதுடன், தீபாவளிப் பண்டிகையைச் சிறப்பாகக் கொண்டாடுமாறு அனைத்து தமிழ் மக்களையும் அவர் அன்புடன் கேட்டு கொண்டார்.

நேற்றிரவு ஈப்போ லிட்டில் இந்தியா வர்த்தை சங்க பொறுப்பாளர்களை சந்தித்ததுடன் அங்கு நிறுவப்பட்ட நவீன கழிவரையை திறந்து வைத்துடன் ஈப்போ லிட்டில் இந்தியா வணிகர்கள் சங்கத்திற்கு 20 ஆயிரம் ரிங்கிட் நிதி வழங்கினார் என்பது குறிப்பிடத்தக்கது.

- பார்த்திபன் நாகராஜன்