எல்லை தாண்டிய புகைமூட்டப் பிரச்சினையைக் கையாள்வதில் இந்தோனேசியாவிற்கு ஆதரவளிக்க மலேசியா உறுதியாக உள்ளது: ஸாஹித் ஹமிடி

கோலாலம்பூர்:

மலேசியா, எல்லை தாண்டிய புகைமூட்டப் பிரச்சினையைக் கையாள்வதில் இந்தோனேசியாவிற்கு ஆதரவளிக்க தனது உறுதியை மீண்டும் உறுதிப்படுத்தியுள்ளது. 

அமைச்சரவைக் கூட்டத்தில் நடத்தப்பட்ட விவாதங்களைத் தொடர்ந்து இந்த முடிவு எடுக்கப்பட்டுள்ளது என்று துணைப் பிரதமர் டத்தோ ஸ்ரீ ஸாஹித் ஹமிடி கூறினார்.

உதவி வழங்க மலேசியா தயாராக இருப்பதை துணைப் பிரதமர் உறுதிப்படுத்தியுள்ளார். 

இதில் ஒரு Bombardier CL-415MP விமானம், மூன்று ஹெலிகாப்டர்கள், தேசிய பேரிடர் மேலாண்மை முகமை (NADMA), மலேசிய கடல்சார் அமலாக்க முகமை (APMM), மலேசிய அரச விமானப்படை (RMAF) ஆகியவற்றைச் சேர்ந்த 52 பணியாளர்கள் தயார் நிலையில் உள்ளனர்.

இந்தோனேசிய அதிகாரிகள் 16,000-க்கும் மேற்பட்ட பணியாளர்களையும், தீயணைப்பு விமானங்கள், ஹெலிகாப்டர்களையும் பணியில் ஈடுபடுத்தியுள்ளனர். 

இருப்பினும், மோசமான தெரிவுநிலை (visibility), மேக விதைப்பிற்கு (cloud-seeding) ஏற்ற மேகங்கள் இல்லாததால் மீட்புப் பணிகள் சவாலாக மாறியுள்ளன.

இருதரப்பு ஒருங்கிணைப்பு: தகுந்த சூழல் உருவானவுடன் உதவிகளை உடனடியாகக் கொண்டு சேர்ப்பதற்கான தளவாடங்களை ஒருங்கிணைக்க இரு நாடுகளுக்கும் இடையே உயர்மட்டத் தொடர்புகள் தொடர்கின்றன என்று அஹ்மத் ஸாஹித் ஹமிடி குறிப்பிட்டார்.

- பார்த்திபன் நாகராஜன்