ஐரோப்பாவில் அதிகரிக்கும் டீசல் தட்டுப்பாடு: உலக எரிசக்திச் சந்தையில் புதிய திருப்பம் ஏற்படுமா?

மாஸ்கோ:

கடந்த 2022ஆம் ஆண்டு ரஷ்யா - உக்ரைன் போர் தொடங்கியது. இந்தப் போரில் உக்ரைனுக்கு ஆதரவளிக்கும் நோக்கில், ரஷ்யாவின் எரிசக்தி இறக்குமதிக்கு ஐரோப்பிய நாடுகள் பல்வேறு பொருளாதாரத் தடைகளை விதித்தன. குறிப்பாக, டீசல் இறக்குமதியில் கணிசமான அளவுக்கு ரஷ்யாவைச் சார்ந்திருந்த ஐரோப்பிய நாடுகள், இந்தத் தடைகளால் கடுமையான பாதிப்புகளைச் சந்தித்தன.

இதற்கிடையில், மத்திய கிழக்கில் அதிகரித்து வரும் ஈரான் –அமெரிக்க மோதலால் உலகளாவிய எரிசக்திச் சந்தையில் மேலும் நிச்சயமற்ற சூழல் உருவாகியுள்ளது. 

இதன் காரணமாக, ஐரோப்பாவில் எரிபொருள் விநியோகம் தொடர்பான கவலைகள் அதிகரித்து வருகின்றன. 

இதேவேளையில், சீனாவும் தனது உள்நாட்டுத் தேவைகளுக்கு முன்னுரிமை அளித்து எரிபொருள் ஏற்றுமதியைக் கட்டுப்படுத்தும் சூழல் ஏற்பட்டால், உலகச் சந்தையில் டீசல் விநியோகம் மேலும் பாதிக்கப்படலாம்.

இத்தகைய சூழலில், ஐரோப்பிய நாடுகள் புதிய எரிபொருள் விநியோக நாடுகளைத் தேட வேண்டிய கட்டாயத்திற்குத் தள்ளப்பட்டுள்ளன. 

இதன் ஒரு பகுதியாக, அமெரிக்காவிடமிருந்து டீசல் இறக்குமதியை அதிகரிக்க ஐரோப்பா முயற்சி மேற்கொண்டுள்ளது. 

கடந்த ஆண்டுடன் ஒப்பிடுகையில், இந்த ஆண்டு ஜனவரி மாதத்தில் அமெரிக்காவிலிருந்து ஐரோப்பா இறக்குமதி செய்த டீசலின் அளவு இருமடங்காக அதிகரித்ததாகக் கூறப்படுகிறது.

ஆனால், ஐரோப்பாவின் எரிபொருள் தேவையை மேலும் சிக்கலாக்கும் வகையில், அமெரிக்காவிலிருந்து மேற்கொள்ளப்படும் டீசல் ஏற்றுமதியைக் கட்டுப்படுத்துவது குறித்தும் டிரம்ப் நிர்வாகம் ஆலோசித்து வருவதாகத் தகவல்கள் வெளியாகியுள்ளன. 

இந்த நடவடிக்கை நடைமுறைக்கு வந்தால், ஏற்கெனவே விநியோக நெருக்கடியை எதிர்கொண்டு வரும் ஐரோப்பிய நாடுகளுக்குப் புதிய சவால்கள் உருவாகலாம்.

இந்தச் சூழலில், ஐரோப்பாவின் முக்கிய மாற்று எரிபொருள் விநியோக நாடுகளில் ஒன்றாக இந்தியா உருவெடுக்கும் வாய்ப்பு ஏற்பட்டுள்ளது. உலகின் முக்கிய எண்ணெய் சுத்திகரிப்பு மையங்களில் ஒன்றாக விளங்கும் இந்தியா, கணிசமான அளவில் கச்சா எண்ணெயை இறக்குமதி செய்து, அதைச் சுத்திகரித்து டீசல் உள்ளிட்ட பெட்ரோலியப் பொருட்களாக மாற்றி வெளிநாடுகளுக்கு ஏற்றுமதி செய்து வருகிறது.

ஐரோப்பாவின் தற்போதைய எரிசக்தி நெருக்கடிக்கு நீண்டகாலக் கொள்கை மாற்றங்களும் ஒரு காரணமாகக் கூறப்படுகின்றன. கடந்த 20 ஆண்டுகளில், ஐரோப்பாவின் எண்ணெய் சுத்திகரிப்புத் திறன் சுமார் 25 சதவீதம் வரை குறைந்துள்ளதாகக் கூறப்படுகிறது. 

புதுப்பிக்கத்தக்க எரிசக்திக்கு முன்னுரிமை அளித்தல், பசுமை ஆற்றலுக்கு மாறுதல் மற்றும் சுற்றுச்சூழல் இலக்குகளை அடைதல் போன்ற நடவடிக்கைகள் இந்த மாற்றத்தில் பங்கு வகித்துள்ளன.

ஆனால், புதுப்பிக்கத்தக்க எரிசக்திக்கு மாறும் முயற்சிகளுடன், பாரம்பரிய எரிபொருட்களின் விநியோகப் பாதுகாப்பையும் சமநிலைப்படுத்த வேண்டிய அவசியம் தற்போது ஐரோப்பாவுக்கு ஏற்பட்டுள்ளது. சர்வதேச அரசியல் மோதல்கள், பொருளாதாரத் தடைகள் மற்றும் எரிபொருள் விநியோகத்தில் ஏற்படும் தடைகள் ஆகியவை இந்தச் சவாலை மேலும் தீவிரப்படுத்துகின்றன. மொத்தத்தில், ஐரோப்பாவின் டீசல் தேவையைப் பூர்த்தி செய்வதில் இந்தியாவுக்கு புதிய வாய்ப்புகள் உருவாகியுள்ளன.

அதே நேரத்தில், ரஷ்ய எண்ணெய் தொடர்பான தடைகள், சர்வதேச வர்த்தக விதிமுறைகள் மற்றும் உலகளாவிய எரிசக்தி விலை மாற்றங்கள் ஆகியவை இந்த வாய்ப்பின் எதிர்காலத்தைத் தீர்மானிக்கக்கூடும். இந்தச் சவால்களை இந்தியா எவ்வாறு எதிர்கொள்கிறது என்பதைப் பொறுத்தே, உலக எரிசக்திச் சந்தையில் இந்தியாவின் பங்கு எந்த அளவுக்கு அதிகரிக்கும் என்பது தெரியவரும்.

- ஆர்யன்