மழை பெய்யும்போது குடையைத் தேடாதீர்கள்; பெர்கேசோவின் 24 மணி நேர பாதுகாப்பு திட்டத்தில் உடனடியாக இணையுங்கள்: டத்தோஸ்ரீ ரமணன்

அலோர்காஜா:

சிகிச்சைச் செலவுகள் தற்போது அதிகரித்துள்ளதைத் தொடர்ந்து, இதற்கு முன்னர்  பெர்கேசோவின் 24 மணி நேர பாதுகாப்பு திட்டத்தில் பங்கேற்க விரும்பாத மொத்தம் 1.2 மில்லியன் பங்களிப்பாளர்கள், தங்கள் காப்பீட்டை மீண்டும் பெற முன்வர வேண்டும்.

ஜூன் 1 முதல் செப்டம்பர் 30 வரையிலான காலகட்டத்தில் மட்டும், இந்த திட்டத்தில் 10,424 கோரிக்கைகள் அல்லது ஒரு நாளைக்கு சராசரியாக 85 வழக்குகள் பதிவு செய்யப்பட்டுள்ளது.

ஆகையால் இந்த விஷயத்தை வலியுறுத்த வேண்டியது அவசியம் என்று மனிதவள அமைச்சர் டத்தோஸ்ரீ ஆர். ரமணன் கூறினார்.

2027-ஆம் ஆண்டுக்கான நிதிநிலை அறிக்கை மூலம் ஆண்டுக்கு 150 ரிங்கிட் கூடுதல் வரிச் சலுகையை, பங்களிப்பாளர்கள் இத்திட்டத்தில் மீண்டும் இணைவதற்கான ஒரு ஊக்கமளிப்பாகப் பயன்படுத்தலாம்.

மழை பெய்யும்போது குடையைத் தேடாதீர்கள், ஏனென்றால் இப்போது மருத்துவச் செலவுகள் மிக அதிகம்.

முன்பு, சிகிச்சைச் செலவுகள் பல்லாயிரக்கணக்கான ரிங்கிட்களாக இருந்தன.

இப்போது அவை லட்சக்கணக்கான ரிங்கிட்களை எட்டுகின்றன, சில சமயங்களில் 1 மில்லியன் ரிங்கிட்டை கூட எட்டக்கூடும்.

விபத்து திடீரென நடப்பதால் அது விபத்து என்று அழைக்கப்படுகிறது.

எனவே, நாம் நமக்கான பாதுகாப்பைக் கண்டறிய வேண்டும், காலம் கடந்த பிறகு அதை உணர்ந்து கொள்ளக்கூடாது என்று அவர் கூறினார்.

மலாக்கா டத்தாரான் கெரிஸில் நடைபெற்ற 'ஐ லிண்டங் யு கெகார் @ மலாக்கா' நிகழ்ச்சியைத் தொடங்கி வைத்த பிறகு சந்தித்தபோது அவர் இவ்வாறு கூறினார்.

- பார்த்திபன் நாகராஜன்