1எம்.டி.பி வழக்கு விசாரணை: தண்டனையை ஒத்திவைக்கும் நஜிப் ரசாக்கின் விண்ணப்ப மனு தள்ளுபடி 

கோலாலம்பூர்: 

1எம்.டி.பி வழக்கில் விதிக்கப்பட்ட 15 ஆண்டுகள் சிறைதண்டனை, 11.4 பில்லியன் ரிங்கிட் அபராதத்தை இடைக்காலமாக நிறுத்தி வைக்குமாறு முன்னாள் பிரதமர் நஜிப் ரசாக் மேற்கொண்ட விண்ணப்ப மனு தள்ளுபடி செய்யப்பட்டது 

பிரதிவாதி மற்றும் அரசுத் தரப்பு வழக்கறிஞர்களின் வாதங்களைக் கேட்டறிந்த பிறகு, நீதிபதி நூர் ருவேனா முகமட் நுர்டின் இந்தத் தீர்ப்பை வழங்கினார்.

மனுதாரரான 73 வயதான நஜீப், மேல்முறையீட்டு நீதிமன்றத்தில் தமது மேல்முறையீடு முடிவடையும் வரை இந்தத் தண்டனை அமலாக்கத்தை இடைநிறுத்துமாறு கோரியிருந்தார்.

இருப்பினும், தண்டனையை இடைநிறுத்துவதற்கு ஏதுவான சிறப்பு அல்லது விதிவிலக்கான காரணங்களை மனுதாரர் நிரூபிக்கத் தவறிவிட்டார் என்று நீதிபதி தமது தீர்ப்பில் குறிப்பிட்டார்.

எஸ்ஆர்சி இன்டர்நேஷனல் வழக்கில் நஜீப்பின் தண்டனையை மேல்முறையீட்டு மற்றும் கூட்டரசு நீதிமன்றங்கள் உறுதி செய்துள்ளன.

இதனால், அவரை இனி முதன்முறை குற்றம் செய்தவராகக் கருத முடியாது என்றும் நீதிபதி தெளிவுபடுத்தினார்.

கடந்த டிசம்பர் 26 அன்று, 1MDB நிதியில் RM2.3 பில்லியன் தொடர்பில் அதிகாரத்தை தவறாகப் பயன்படுத்திய 4 குற்றச்சாட்டுகள் மற்றும் பணமோசடி தொடர்பான 21 குற்றச்சாட்டுகளில் அவர் குற்றவாளி எனத் தீர்ப்பளிக்கப்பட்டார்.

அதிகாரத்தைத் தவறாகப் பயன்படுத்தியதற்காக அவருக்கு 15 ஆண்டுகள் சிறைத்தண்டனையும் RM11.4 பில்லியன் அபராதமும் விதிக்கப்பட்டது.

-மவித்திரன்