குறைந்த ஊதியப் பிரச்சினையை 2027ஆம் ஆண்டுக்கான பட்ஜெட் அறிக்கை கவனத்தில் கொள்ள வேண்டும்: சார்லஸ் சந்தியாகோ

கோலாலம்பூர்:

மலேசியாவில் நிலவும் குறைந்த ஊதியப் பிரச்சினையையும், பொருளாதார வளர்ச்சியின் பலன்களை மக்கள் இன்னும் பெறவில்லை என்ற உண்மையையும் 2027ஆம் ஆண்டுக்கான பட்ஜெட் அறிக்கை கவனத்தில் கொள்ள வேண்டும்.

சுயாதீன ஆராய்ச்சி மையமான கசானா ஆராய்ச்சி நிறுவனத்தின் ஆய்வை மேற்கோள் காட்டி, கிள்ளான் முன்னாள் நாடாளுமன்ற உறுப்பினர் சார்லஸ் சாண்டியாகோ, 70% மலேசியர்கள் பொருளாதார வளர்ச்சியின் பலன்களை உணரவில்லை என்று கூறினார்.

மேலும், புள்ளிவிவரத் துறையின் தரவுகளையும் அவர் குறிப்பிட்டார்.

அதன்படி, மலேசியாவில் ஊதியம் பெறுபவர்களில் மூன்றில் இரண்டு பேர் பகுதித் திறன் அல்லது குறைந்த திறன் கொண்ட வேலைகளில் பணிபுரிகின்றனர். அவர்களின் சராசரி சம்பளம் முறையே வெறும் 2,223  ரிங்கி, 1,758 ரிங்கிட் மட்டுமே.

மலேசியாவின் மொத்த உள்நாட்டு உற்பத்தி மொத்த தேசிய வருமானம் மற்றும் அந்நிய நேரடி முதலீடு ஆகியவை அதிகரித்து வந்தாலும், வாழ்க்கைச் செலவுக்கு ஏற்ப ஊதிய வளர்ச்சி அதிகரிக்கத் தவறினால், மக்கள் செழிப்பை அனுபவிக்க மாட்டார்கள்.

பொருளாதாரம் வளர்ந்து வந்தாலும், அவர்களின் குடும்ப நிதி நிலைமை மேம்படும் என்று சொல்ல முடியாது.

பொருளாதார வளர்ச்சி எப்போது வலுவான குடும்ப வருமானம்,  நிதிப் பாதுகாப்பாக மாறும்? என்ற கேள்விக்குத்தான் 2027ஆம் ஆண்டுக்கான நிதிநிலை அறிக்கை பதிலளிக்க வேண்டும் என்று அவர் எக்ஸ்  தளத்தில் பதிவிட்டிருந்தார்.

மேலும், தீவிரமான ஊதிய உத்தியை அறிமுகப்படுத்தவும், சமூகப் பாதுகாப்பை வலுப்படுத்தவும், வாழ்க்கைச் செலவுக் குறைப்புக்கு நடவடிக்கை எடுக்கவும் அவர் அரசாங்கத்தை வலியுறுத்தினார்.

இது மற்றொரு படியாகவோ அல்லது ஒரே ஒரு அறிவிப்பாகவோ மட்டும் இருக்கக்கூடாது.

ஒரே ஒரு பண உதவியால் கட்டமைப்பு ரீதியான கட்டுப்படியாகும் நெருக்கடியைத் தீர்க்க முடியும் என்று நாடு நடிப்பதை நிறுத்த வேண்டும் என்று அவர் கூறினார்.

- பார்த்திபன் நாகராஜன்