சீனாவிலிருந்து திரும்பிய பிறகு அந்தோனி லோக் தனது ராஜினாமா நடவடிக்கைகளைக் கையாளவுள்ளார்

கோலாலம்பூர்:

பெய்ஜிங்கில் நடைபெறும் 12ஆவது ஏபெக் போக்குவரத்து அமைச்சர்கள் கூட்டத்தில் மலேசியாவைப் பிரதிநிதித்துவப்படுத்துவதற்காக, போக்குவரத்து அமைச்சர் அந்தோனி லோக் திட்டமிட்டபடி சீனாவில் தனது உத்தியோகப்பூர்வ நிகழ்ச்சிகளைத் தொடர்வார்.

இந்த நிகழ்ச்சிகளில் பல இருதரப்பு சந்திப்புகளும், மலேசியா மற்றும் சீனா இடையேயான போக்குவரத்து ஒத்துழைப்புக்கான புரிந்துணர்வு ஒப்பந்தம் உட்பட இரண்டு புரிந்துணர்வு ஒப்பந்தங்களில்  கையெழுத்திடுதலும் அடங்கும் என்று போக்குவரத்து அமைச்சு தெரிவித்துள்ளது.

பெய்ஜிங்கில் தனது உத்தியோகப்பூர்வ நிகழ்ச்சிகளை முடித்த பிறகு, அமைச்சர் ஷாங்காய்க்குச் சென்று பிரதமரின் குழுவில் இணைவார்.

பின்னர், போக்குவரத்து அமைச்சர் பதவியிலிருந்து தனது ராஜினாமா செயல்முறை தொடர்பான விஷயங்களைக் கையாளுவதற்காக மலேசியா திரும்புவார் என்று அவர் ஒரு அறிக்கையில் தெரிவித்துள்ளார்.

அமைச்சின் அனைத்து விவகாரங்களும் பொறுப்புகளும் வழக்கம் போல் தொழில்முறையாகவும் ஒழுங்காகவும் மேற்கொள்ளப்படுவதை தொடர்ந்து உறுதி செய்வோம் என்று அமைச்சு கூறியது.

ஏபெக் போக்குவரத்து அமைச்சர்கள் கூட்டம் இன்று தொடங்கி இரண்டு நாட்கள் நடைபெற உள்ளது.

முன்னாள் பிரதமர் நஜிப் ரசாக்கிற்கு நிபந்தனை மன்னிப்பு வழங்கப்பட்டதைத் தொடர்ந்து, ஜசெக பொதுச் செயலாளராகவும் இருக்கும் லோக், சனிக்கிழமையன்று அமைச்சர் பதவியை ராஜினாமா செய்வதாக அறிவித்தார்.

- பார்த்திபன் நாகராஜன்