பாராங் கத்தியை பயன்படுத்தி கலவரம்: நான்கு நண்பர்களுக்கு 2,900 ரிங்கிட் அபராதம்

ஷாஆலம்:

சமூக ஊடகங்களில் வைரலாகும் வரை பாராங் கத்தியை பயன்படுத்தி கலவரத்தில் ஈடுபட்ட நான்கு நண்பர்களின் செயல்களுக்குப் பின்விளைவாக, இன்று இங்குள்ள மாஜிஸ்திரேட் நீதிமன்றம் அவர்கள் ஒவ்வொருவருக்கும் தலா 2,900 ரிங்கிட் அபராதம் விதித்தது.

குற்றம் சாட்டப்பட்டவர்களான ஆர். கார்த்திக் (33), ஆர்.ஜே. ஓமார் சங்கர் (39), பாண்டியன் (25), சி.எஸ். விஸ்வராஜ் (24) ஆகியோர் தங்களுக்கு வாசிக்கப்பட்ட குற்றச்சாட்டுகளை ஒப்புக்கொண்டதை அடுத்து, மாஜிஸ்திரேட் வான் நூரா நிசா என்காடிரின் இந்தத் தீர்ப்பை வழங்கினார்.

அபராதத்தைச் செலுத்தத் தவறினால், குற்றம் சாட்டப்பட்ட ஒவ்வொருவருக்கும் ஐந்து மாதங்கள் சிறைத்தண்டனை விதிக்கப்படும் என்றும் நீதிமன்றம் உத்தரவிட்டது. அவர்கள் அபராதத்தைச் செலுத்தினர்.

குற்றச்சாட்டின்படி,  கடந்தஆகஸ்ட் 13 அன்று காலை சுமார் 11 மணியளவில், தமன் ஸ்ரீ மூடா, பத்து 8, ஜாலான் புக்கிட் கெமுனிங் என்ற இடத்தில், பாராங் கத்தியை பயன்படுத்தி நடந்த கலவரத்தில் வேண்டுமென்றே பங்கேற்றதாக அவர்கள் மீது குற்றம் சாட்டப்பட்டுள்ளது.

இந்தக் குற்றச்சாட்டு, தண்டனைச் சட்டத்தின் பிரிவு 148-இன் கீழ் சுமத்தப்பட்டது. இதற்கு ஐந்து ஆண்டுகள் வரை சிறைத்தண்டனை அல்லது அபராதம் அல்லது இரண்டும் விதிக்கப்படலாம்.

வழக்கறிஞர் முஹம்மது சைஃபுல்லா முஹம்மது அஸ்மி தனது தண்டனைக் குறைப்பு வாதத்தில், கார்த்திக், ஓமர் ஆகியோர் மாதம் 2,000 ரிங்கிட் வருமானத்துடன் லோரி ஓட்டுநர்களாகப் பணிபுரிந்ததாகக் கூறினார்.

காயமடைந்த ஓமருக்கு உதவ கார்த்திக் கையில் கட்டுடன் வந்தார்.

அவர்கள் பாதிக்கப்பட்டவர்கள், தங்களைத் தற்காத்துக் கொள்ள மட்டுமே அவ்வாறு செய்தனர் என்று அவர் கூறினார்.

இதற்கிடையில், பாண்டியன், விஸ்வராஜ் ஆகியோரும் இந்த வழக்கில் பாதிக்கப்பட்டவர்கள் என்றும், இருவரும் பாதுகாப்புப் பணியாளர்கள் என்றும்  வழக்கறிஞர் எம். பார்த்திபன் விளக்கினார்.

உண்மையில், விஸ்வராஜின் மனைவி தற்போது தனது பிரசவத் தேதிக்காகக் காத்திருக்கிறார்.  அவர்கள் தங்கள் தவறை உணர்ந்து மன்னிப்புக் கோருகிறார்கள்.

அந்தக் குடும்பத்தால் 2,000 ரிங்கிட் மட்டுமே வழங்க முடியும் என்பதால், அவர்கள் குறைந்தபட்ச அபராதம் விதிக்கக் கோருகிறார்கள் என்று அவர் விளக்கினார்.

துணை அரசு வழக்கறிஞர் நூர் அமிரா ஜஹாரி, இது ஒரு பாடமாக அமைய வேண்டும் என்பதற்காகப் பொருத்தமான தண்டனை வழங்குமாறு கோரினார்.

- பார்த்திபன் நாகராஜன்