பாஸ் கட்சியின் ஆண்டுக் கூட்டத்தில் ஜமாஅத்தே இஸ்லாமி ஹிந்தின் அகில இந்தியத் தலைவர் சாததுல்லாஹ் ஹுசைனி உரை நிகழ்த்துகிறார்

கோத்தபாரு:

பாஸ் கட்சியின் 73ஆவது ஆண்டுக் கூட்டத்தில் சிறப்பு விருந்தினராக ஜமாஅத்தே இஸ்லாமி ஹிந்தின் அகில இந்தியத் தலைவர் செய்யது சாததுல்லாஹ் ஹுசைனி கலந்துகொண்டு உரை நிகழ்த்துகிறார்.

நாளை செப்டம்பர் 3 ஆம் தேதி பிற்பகல் 2.00 மணிக்கு கிளந்தான் மாநிலத் தலைநகர் கோத்தபாருவில் உள்ள பெர்டானா தங்குவிடுதியில் இந்த ஆண்டுக் கூட்டம் துவங்க உள்ளது.

இரு நாட்கள் நடைபெறும் இக் கூட்டத்திற்கு பாஸ் கட்சியின் தலைவர் டான் ஸ்ரீ ஹாதி அவாங் தலைமை தாங்குகிறார் என்று மாநாட்டு ஒருங்கிணைப்பாளர் டாக்டர் அமீனுர்ரஷீத் பின் யாத்திபான் கூறினார்.

முஸ்லிம் சமூகம் எதிர்கொள்ளும் பிரச்சினைகள் குறித்த கண்ணோட்டங்களைப் பரிமாறிக்கொள்வது, மூலோபாய சர்வதேச வலையமைப்புகளை வலுப்படுத்துவது, குறிப்பாக பாலஸ்தீனம், ஈரான் விவகாரங்களில் ஒருமித்த ஒற்றுமைக் குரலை முன்னெடுத்துச் செல்வது போன்ற விவகாரங்கள் இந்த ஆண்டுக் கூட்டத்தில் விவாதிக்கப்பட உள்ளன என்று அவர் மேலும் கூறினார்.

மாநாட்டில் கலந்துகொள்ள நாட்ய் முழுவதிலும் இருந்து பாஸ் கட்சியின் தொண்டர்கள் கோத்தபாரு நோக்கி பயணம் மேற்கொண்டு வருகிறார்கள்.

- ஃபிதா