டுரியான் துங்கால் துப்பாக்கிச் சூடு வழக்கில் முரணான தடயவியல் கண்டுபிடிப்புகள்; சுதந்திரமான விசாரணை வேண்டும்: வழக்கறிஞர்

கோலாலம்பூர்:

கடந்த ஆண்டு நவம்பரில் மலாக்காவின் டுரியான் துங்கால் பகுதியில் நடந்த துப்பாக்கிச் சூடு சம்பவத்தில் உயிரிழந்த மூன்று ஆண்களின் குடும்பங்களுக்காக வாதாடும் வழக்கறிஞர்கள், பிரேதப் பரிசோதனை அறிக்கையின் மறுஆய்வு முடிவுகள் பாதிக்கப்பட்டவர்களின் மரணச் சூழ்நிலைகள் குறித்து கடுமையான கேள்விகளை எழுப்புவதாகக் கூறி, சுதந்திரமான விசாரணைக்கு அழைப்பு விடுத்துள்ளனர்.

நவம்பர் 24 அன்று நடந்த சம்பவத்தில் உயிரிழந்த மூவரின் பிரேதப் பரிசோதனை அறிக்கையின்படி,

அவர்களில் இருவர் தலையில் சுடப்பட்டதாகவும், மற்றொருவர் மார்பில் மிக அருகில் இருந்து சுடப்பட்டதாகவும், தோட்டா கீழ்நோக்கிப் பயணித்ததாகவும் வழக்கறிஞர் ராஜேஷ் நாகராஜன் கூறினார்.

அவர்களில் ஒருவர் நேரடியாக நெற்றியில் சுடப்பட்டதாகவும், தோட்டா தலையின் கீழ்ப் பின்புறத்தைத் துளைத்ததாகவும் பிரேதப் பரிசோதனை அறிக்கை காட்டுகிறது.

உண்மையில், பிரேதப் பரிசோதனை அறிக்கையில் உள்ள தடயவியல் கண்டுபிடிப்புகள், ஜி. லோகேஸ்வரன், டி. பூனேஸ்வரன்,  எம். புஷ்பநாதன் ஆகியோர் முறையான தற்காப்பு வாதத்திற்கு முரணான சூழ்நிலைகளில் சுடப்பட்டிருக்கலாம் என்ற சாத்தியக்கூற்றை ஆதரிக்கின்றன என்று அவர் கூறினார்.

பிரேதப் பரிசோதனை அறிக்கையின்படி, பாதிக்கப்பட்டவர்கள் அனைவரும் மிக அருகில் இருந்து சுடப்பட்ட துப்பாக்கிக் காயங்களுக்கு உள்ளாகியுள்ளனர்.

பெரும்பாலான தோட்டாக்கள் கீழ்நோக்கிப் பாய்ந்துள்ளதால், துப்பாக்கிச் சூடு நடந்தபோது பாதிக்கப்பட்டவர்கள் இருந்த நிலை குறித்துக் கேள்விகள் எழுகின்றன என்று அவர் கூறினார்.

- பார்த்திபன் நாகராஜன்