பாஸ் கட்சியின் புறக்கணிப்பு எங்களை ஒன்றும் செய்யாது: ஜோகூர் போராட்டத்தை பெர்சத்துவின் இயந்திரமே முன்னெடுத்துச் செல்லும்:  முஹைதீன் யாசின் உறுதி

பாகோ:

16வது ஜோகூர் மாநிலத் தேர்தலில் கட்சியின் பிரச்சாரத்திற்கு உதவ வேண்டாம் என்ற பாஸ் கட்சியின் முடிவை மதிப்பதாகவும், பெர்சத்து தனது சொந்த தேர்தல் பிரச்சார இயந்திரத்தின் பலத்தில் முன்னேறிச் செல்லும் என்றும் பார்ட்டி பிரிபூமி பெர்சத்து மலேசியா (பெர்சத்து) கட்சியின் நிறுவனத் தலைவர் டான் ஸ்ரீ முஹைதீன் யாசின் கூறினார்.

பாஸ் கட்சியின் இந்த முடிவு பெர்சத்துவின் பிரச்சாரத்தைப் பாதிக்காது என்றும், கட்சியின் கொள்கைகள், மக்கள் ஆதரவைப் பெறுவதில் அதன் சாதனைப் பதிவுகள் மீது கவனம் செலுத்துவதாகவும் அவர் கூறினார்.

“பரவாயில்லை. நானும் கேட்கவில்லை. யார் உதவ விரும்பினாலும் உதவலாம். கொள்கையளவில், பெரிகாத்தான் நேஷனல் (பிஎன்) உறுப்பினர்களாகிய நாம் ஒருவருக்கொருவர் ஆதரவளிக்க வேண்டும்.

“ஆனால் எங்கள் கூட்டாளிகள் உதவ வேண்டாம் என்று முடிவு செய்தால், அதை நாங்கள் ஏற்றுக்கொள்கிறோம். எங்கள் சொந்த பலம், கொள்கைகள், சாதனைப் பதிவுகளின் அடிப்படையில் நாங்கள் தொடர்ந்து கடுமையாக உழைப்போம்.” 

"வாக்காளர்கள் தங்கள் முடிவை எப்படி எடுக்க வேண்டும் என்பதை அறிவார்கள் என்று நான் நம்புகிறேன்," என்று இன்று பாகோ விளையாட்டு வளாகத்தில் புக்கிட் கெப்போங் மாநிலத் தொகுதிக்கான வேட்புமனுத் தாக்கலுக்குப் பிறகு அவர் செய்தியாளர்களிடம் கூறினார்.

இருப்பினும், ஜோகூர் தேர்தல் பிரச்சாரத்தின் போது தனது ஆதரவு தேவைப்பட்டால், கூட்டணிக் கட்சிகளுக்கு உதவ பெர்சத்து தயாராக இருக்கும் என்று முஹைதீன் கூறினார்.

"பாஸுக்கு எங்கள் ஆதரவு தேவைப்பட்டால், நாங்கள் உதவுவோம். அதுவே எப்போதுமே எங்கள் அணுகுமுறையாக இருந்து வருகிறது." "நாங்கள் திறந்த மனதுடன் இருக்கிறோம்," என்று அவர் கூறினார்.

56 மாநிலத் தொகுதிகளில் 33 தொகுதிகளில் மட்டுமே போட்டியிடுவதால், ஜோகூர் மாநில அரசாங்கத்தை அமைக்கும் லட்சியம் பிஎன்-க்கு இல்லை என்ற குற்றச்சாட்டுகளுக்குப் பதிலளித்த முஹைதீன், அரசாங்கத்தை அமைக்கத் தேவையான குறைந்தபட்ச எண்ணிக்கையை விட அதிகமான தொகுதிகளில் கூட்டணி போட்டியிடுவதாகக் கூறினார்.

தேர்தலுக்குப் பிறகும் மற்ற கட்சிகளுடன் ஒத்துழைக்க வாய்ப்பு உள்ளது என்றும் அவர் மேலும் கூறினார்.

முன்னதாக, முஹைதீன், 300-க்கும் மேற்பட்ட ஆதரவாளர்களுடன், புக்கிட் கெப்போங் மாநிலத் தொகுதிக்கான பிஎன் வேட்பாளரும், ஜோகூர் பெர்சத்து, ஜோகூர் பிஎன் தலைவருமான டத்தோ டாக்டர் சஹ்ருதீன் ஜமாலுடன் வேட்புமனுத் தாக்கலுக்குச் சென்றார்.

முன்னாள் 17-வது ஜோகூர் மந்திரி பெசாரான சஹ்ருதீன், 2018 முதல் இரண்டு முறை வகித்து வரும் புக்கிட் கெப்போங் தொகுதியில் மீண்டும் போட்டியிடுகிறார். அவர் பாரிசான் நேஷனலின் அஹ்மத் ஷரி யூசோ,  பக்காத்தான் ஹரப்பானின் சி. சுப்ரமணி ஆகியோருக்கு எதிராக மும்முனைப் போட்டியில் களத்தில் உள்ளார்.

- பார்த்திபன் நாகராஜன்