ஜொகூர் மாநில சட்டமன்றம் மே 24ஆம் தேதி கலைக்கப்படுமா?

ஜொகூர்பாரு:

ஜொகூர் மாநில சட்டமன்றம் வரும் மே 24ஆம் தேதி கலைக்கப்படும் என பரவலாக எதிர்பார்க்கப்படுகிறது.

வரும்  மே 24 சிறப்பு ஜொகூர் மாநில சட்டமன்றக் கூட்டம் நடைபெறவுள்ளது.

இந்த கூட்டம் ஜொகூர் மாநிலத் தேர்தலுக்கு  வழிவகுக்கும் வகையில் சட்டமன்றம் கலைக்கப்படுவதாக அறிவிக்கப்படும் என எதிர்பார்க்கப்படுகிறது.

சிறப்பு சட்டமன்றக் கூட்டத்திற்குத் தயாராகுமாறு அனைத்து மாநில சட்டமன்ற உறுப்பினர்களுக்கும் விடுக்கப்படும் கோரிக்கைகள், வாட்ஸ்அப் செயலி வழியாக அவர்களுக்கு அனுப்பத் தொடங்கப்பட்டுள்ளன.

இந்த முறை மாநிலத்தில் உள்ள 56 மாநில சட்டமன்றத் தொகுதிகளிலும் தேசிய முன்னணி போட்டியிடும் என்று ஜொகூர் மந்திரி புசார், ஜொகூர் தேசிய முன்னணி தலைவர் டத்தோ ஓன் ஹபீஸ் காசி நேற்று அறிவித்ததைத் தொடர்ந்து இந்த முன்னேற்றம் ஏற்பட்டுள்ளது.

இந்த அறிவிப்பு புதிய சர்ச்சையைத் தூண்டியதுடன், ஜொகூர் மாநிலத் தேர்தல் குறித்த வதந்திகளால் ஜோகூரில் அரசியல் பதற்றத்தையும் அதிகரித்தது.

இதற்கிடையில், பெமானிஸ் சட்டமன்ற உறுப்பினர் அனுவார் அப்துல் மந்தாப்பைத் தொடர்பு கொண்டபோது, ​​தனது கட்சி சிறப்பு மாநில சட்டமன்றக் கூட்டத்தொடரில் கலந்து கொள்ளத் தயாராகி வருவதாகக் கூறினார்.

- பார்த்திபன் நாகராஜன்