போலி மை கார்ட் பயன்படுத்திய வெளிநாட்டவர் கைது

ஷா ஆலம்: 

போலி மை கார்ட்டைச் சமர்ப்பித்து, தேசியப் பதிவுத் துறையின் (ஜே.பி.என்) அதிகாரிகளை ஏமாற்ற முயன்றதைத் தொடர்ந்து, இந்தோனேசியாவின் லோம்போக்கைச் சேர்ந்த ஒரு பெண் கைது செய்யப்பட்டார்.

உள்ளூர் மக்களைப் போலவே சரளமாக மலாய் மொழி பேசும் மரிசா என்று அழைக்கப்படும் 28 வயதுடைய அந்தப் பெண், இன்று இங்குள்ள க்ளென்மேரியில் உள்ள ஒரு சர்வதேச பிராண்ட் நிறுவனத்திற்குச் சொந்தமான இரண்டு கிடங்குகளில் நடத்தப்பட்ட ஓப் பண்டான் சோதனையில் கைது செய்யப்பட்ட 27 வெளிநாட்டவர்களில் ஒருவர் ஆவார்.

இருப்பினும், ஜே.பி.என் அதிகாரிகள் அந்தப் போலி மை கார்ட்டில் உள்ள பல குறைபாடுகளை உடனடியாகக் கண்டறிந்ததால், அந்தப் பெண்ணின் முயற்சி தோல்வியடைந்தது.

அந்தப் பெண் 300 ரிங்கிட் கட்டணத்தில், கிள்ளானில் உள்ள ஒரு நபரிடமிருந்து மை கார்ட்டைப் பெற்றதாகக் கூறினார்.

வேலைக்கு விண்ணப்பிப்பதற்கு அந்த அடையாள ஆவணத்தைப் பயன்படுத்துவதாகவும், எட்டு ஆண்டுகளாக இந்த நாட்டில் வசித்து வருவதாகவும் அவர் தெரிவித்தார்.

அதே நடவடிக்கையில், 30 வயது கடந்த ஒரு இந்தோனேசிய ஆண், ஒரு வேலை முகமையால் 7,000 ரிங்கிட் மோசடி செய்யப்பட்டதைத் தொடர்ந்து, வேலை தேடும் விரக்தியில், போலி மை கார்ட்டைப் பயன்படுத்த வேண்டிய கட்டாயத்திற்குத் தள்ளப்பட்டதாகக் கூறினார்.

மலேசியாவில் தொடர்ந்து தங்கி வேலை தேடுவதற்காக, போலி மை கார்ட்டை வாங்க, தனது கிராமத்தில் உள்ள தனது குடும்பத்தினரிடமிருந்து 400 ரிங்கிட் கடன் வாங்க வேண்டியிருந்ததாக அவர் தெரிவித்தார்.

இதற்கிடையில், புத்ராஜெயா ஜே.பி.என்-இன் அமலாக்கப் பிரிவு இயக்குநர் மஸ்ஹாத் அப்த் அஜிஸ், அந்தத் தொழிற்சாலையில் வேலை பெறுவதற்காக, போலி மை கார்ட், மற்றவர்களின் மை கார்ட்டைப் பயன்படுத்தியதாகச் சந்தேகிக்கப்பட்டதைத் தொடர்ந்து, சம்பந்தப்பட்ட அனைத்து வெளிநாட்டவர்களும் தடுத்து வைக்கப்பட்டனர்.

மனிதவள நிறுவனம் மூலம் வேலை விண்ணப்ப நோக்கங்களுக்காக, 50 ரிங்கிட்  போன்ற குறைந்த விலையில், மற்றவர்களின் மை கார்ட்டை வாடகைக்கு எடுக்கும் சில நபர்களை, ஆரம்பக் கட்ட விசாரணையில் தனது நிறுவனம் கண்டறிந்ததாக அவர் கூறினார்.

"நாங்கள் கைது செய்து, மிகவும் விரிவான விசாரணைக்காக புத்ராஜெயா ஜே.பி.என்-க்கு அழைத்துச் செல்வோம். குற்றங்கள் ஏதேனும் கண்டறியப்பட்டால், நாங்கள் வழக்குத் தொடர்வோம்" என்றார் அவர்.

அந்த நடவடிக்கையில் கைது செய்யப்பட்டவர்களில் 21 பெண்கள் உட்பட ஆறு ஆண்கள் இருப்பதாக அவர் கூறினார்.

1990 ஆம் ஆண்டின் தேசியப் பதிவு விதிமுறைகளின் விதி 25 (1)(e) கீழ் அவர்கள் விசாரிக்கப்பட்டு வருகின்றனர்.

அந்த நடவடிக்கை, மலேசிய குடிநுழைவுத் துறை (ஜே.ஐ.எம்), தொழிலாளர் துறையின் (ஜே.டி.கே) அதிகாரிகளுடன் இணைந்து ஒருங்கிணைந்த முறையில் மேற்கொள்ளப்பட்டதாக அவர் கூறினார்.

- சங்கீர்த்தனா