ஈப்போவில் பரபரப்பு: 70 வயது மூதாட்டி வெட்டிக்கொலை

ஈப்போ:

தாமான் தேசா அமான் பகுதியில் உள்ள ஒரு வீட்டில் 70 வயது மதிக்கத்தக்க மூதாட்டி ஒருவர் சடலமாகக் கண்டெடுக்கப்பட்டார். நேற்று இரவு நிகழ்ந்த இந்தச் சம்பவத்தில், அந்தப் பெண்மணி கொடூரமாகக் கொலை செய்யப்பட்டிருப்பதாகக் காவல்துறை தரப்புத் தெரிவித்துள்ளது. 

மருத்துவ அதிகாரிகளின் முதற்கட்ட சோதனையில், அவர் உயிரிழந்துவிட்டது உறுதி செய்யப்பட்டது.

உயிரிழந்தவரின் உடல், தலை, கழுத்துப் பகுதிகளில் வெட்டுக் காயங்கள் இருப்பது கண்டறியப்பட்டுள்ளது. இச்சம்பவம் நடந்த இடத்தில் இருந்து கொலைக்குப் பயன்படுத்தப்பட்டதாகச் சந்தேகிக்கப்படும் ஒரு அரிவாளையும் காவல்துறையினர் கைப்பற்றியுள்ளனர். 

இந்தத் துயரமான நிகழ்வு அப்பகுதி மக்களிடையே பெரும் அதிர்ச்சியை ஏற்படுத்தியுள்ளது.

இது தொடர்பாக, 52 வயதுடைய உள்ளூர் நபர் ஒருவரைத் தற்காப்புக் காவல்துறையினர் சம்பவ இடத்திலேயே கைது செய்துள்ளனர். 

இந்தத் தாக்குதலுக்கான பின்னணிக் காரணம் குறித்துத் தீவிர விசாரணை நடைபெற்று வருகிறது. தற்போது இக்கொலை வழக்கு, தண்டனைச் சட்டத்தின் 302-ஆவது பிரிவின் கீழ் கொலை வழக்காகப் பதிவு செய்யப்பட்டுள்ளது.

உயிரிழந்தவரின் உடல் பிரேதப் பரிசோதனைக்காக ராஜா பெர்மைசூரி பைனுன் மருத்துவமனைக்கு அனுப்பி வைக்கப்பட்டுள்ளது. இச்சம்பவம் குறித்து பொதுமக்கள் தேவையற்ற வதந்திகளைப் பரப்ப வேண்டாம் என்று கேட்டுக்கொள்ளப்பட்டுள்ளனர். 

இது குறித்துத் தகவல் தெரிந்தவர்கள் உடனடியாக ஈப்போ மாவட்டத் தலைமையகத்தையோ அல்லது அருகிலுள்ள காவல் நிலையத்தையோ தொடர்பு கொள்ளுமாறு அறிவுறுத்தப்பட்டுள்ளனர்.

-கிரித்திக்கா