உலகக் கோப்பை 2026: ஈரானுக்குத் தடை இல்லை

சூரிக்: 

2026 உலகக் கோப்பையில் ஈரானுக்குப் பதிலாக இத்தாலி விளையாட வேண்டும் என்ற முன்மொழிவை சர்வதேச கால்பந்து சங்க கூட்டமைப்பு (பிஃப்பா) நிராகரித்து ஈரான் அணி "நிச்சயமாக வரும்" என்று அது வலியுறுத்தியுள்ளது.

அந்த முன்மொழிவு, அமெரிக்காவின் சிறப்புத் தூதர் பாவோலோ ஸாம்போல்லி என்பவரால், டொனால்ட் டிரம்ப், பிஃப்பா ஜனாதிபதி ஜியானி இன்ஃபான்டினோ ஆகியோரிடம் முன்வைக்கப்பட்டது.

மிலனில் பிறந்த ஸாம்போல்லி, தகுதி பெறத் தவறிய போதிலும், நான்கு முறை உலகக் கோப்பையை வென்ற இத்தாலிkக்கு ஈரானுக்குப் பதிலாக அவர்களுக்கு ஒரு இடத்தை வழங்குவதை நியாயப்படுத்துவதாக வாதிட்டதாகத் தெரிகிறது.

இருப்பினும், அமெரிக்கா, கனடா, மெக்சிகோவில் நடைபெறும் போட்டியிலிருந்து ஈரானை நீக்கி, அதற்குப் பதிலாக இத்தாலியைச் சேர்க்க எந்தத் திட்டமும் இல்லை என்று பிஃப்பா தெரிவித்துள்ளது.

"ஈரான் அணி நிச்சியமாக 2026 உலகக் கோப்பையில் கால் பாதிக்கும். அப்போதைய சூழ்நிலை அமைதியாக இருக்கும் என்று நாங்கள் நம்புகிறோம்.

"ஈரான், அதன் மக்களைப் பிரதிநிதித்துவப்படுத்த வேண்டுமென்றால் உலகக் கோப்பையில் பங்கேற்க வேண்டும். அவர்கள் ஏற்கனவே தகுதி பெற்றுள்ளனர், அவர்கள் உண்மையில் விளையாட விரும்புகிறார்கள், மேலும் அவர்கள் விளையாட வேண்டும்" என்று இன்ஃபான்டினோ கூறினார்.

ஈரான் கால்பந்துக் கூட்டமைப்பும், தாம் பங்கேற்க இன்னும் திட்டமிட்டுள்ளதாக வலியுறுத்தியது.

ஆசிய கால்பந்துக் கூட்டமைப்பின் எட்டு பிரதிநிதிகளில் ஒருவராக ஈரான் உலகக் கோப்பைக்குத் தகுதி பெற்றது. அதே சமயம், இத்தாலி 16 ஐரோப்பிய இடங்களில் ஒன்றைக் கைப்பற்றத் தவறியது குறிப்பிடத்தக்கது.

2021 ஐரோப்பிய சாம்பியனான இத்தாலி, தொடர்ந்து மூன்றாவது முறையாக உலகக் கோப்பைக்குத் தகுதி பெறத் தவறியது. இது அந்த அணிக்கு ஒரு பெரிய அடியாகும்.
பிஃப்பா விதிமுறைகளின்படி, ஈரான் அந்தப் போட்டியை புறக்கணித்தால், அவர்களின் இடத்தை மற்றொரு நாட்டுடன் மாற்றுவது உள்ளிட்ட நடவடிக்கைகளை எடுக்கும் முழு அதிகாரம், அந்த அமைப்பிற்கு உண்டு.

2026 உலகக் கோப்பை ஜூன் 11 ஆம் தேதி தொடங்கும் என்று திட்டமிடப்பட்டுள்ளது. இறுதிப் போட்டி ஜூலை 19 ஆம் தேதி மெட்லைஃப் ஸ்டேடியத்தில் நடைபெறும்.

ஈரான், ஜூன் 15 ஆம் தேதி நியூசிலாந்துக்கு எதிராகவும், ஜூன் 21 ஆம் தேதி பெல்ஜியத்துக்கு எதிராகவும், ஜூன் 26 ஆம் தேதி எகிப்துக்கு எதிராகவும் தனது குழு G பிரச்சாரத்தைத் தொடங்கும்.

-சங்கீர்த்தனா