ரசகுல்லா சாப்பிட்ட 11 வயது சிறுவனை எரியும் அடுப்பில் வீசிய சமையல்காரர்

பஸ்தி:

உத்தரப் பிரதேச மாநிலம் ஆக்ராவில் நடைபெற்ற ஒரு திருமண விழாவில், ரசகுல்லா சாப்பிட்ட 11 வயது சிறுவனைச் சமையல்காரர் ஒருவர் எரியும் அடுப்பிற்குள் தூக்கி வீசிய கொடூரச் சம்பவம் பெரும் பரபரப்பை ஏற்படுத்தியுள்ளது. 

திருமண விருந்து நடைபெற்றுக் கொண்டிருந்தபோது, அங்கு வந்த சிறுவன் ஒரு ரசகுல்லாவை எடுத்துச் சாப்பிட்டுள்ளார். இதைக் கண்டு ஆத்திரமடைந்த சமையல்காரர், அந்தச் சிறுவனைத் தாக்கியதோடு நிறுத்தாமல், அருகில் எரிந்துகொண்டிருந்த தணல் அடுப்பில் தூக்கி வீசியுள்ளார்.

இந்தக் கொடூரச் செயலில் சிறுவனின் முதுகு, கை பகுதிகளில் பலத்த தீக்காயங்கள் ஏற்பட்டன. சிறுவனின் அலறல் சத்தத்தைக் கேட்டு ஓடிவந்த உறவினர்கள், விருந்தினர்கள், அவரை மீட்டு உடனடியாக அருகில் உள்ள மருத்துவமனைக்குக் கொண்டு சென்றனர். தற்போது அந்தச் சிறுவன் தீவிர சிகிச்சைப் பிரிவில் அனுமதிக்கப்பட்டு சிகிச்சை பெற்று வருகிறார்.

சம்பவம் நடந்த இடத்திலிருந்து சமையல்காரர் உடனடியாகத் தப்பி ஓடிவிட்டார். இது குறித்துச் சிறுவனின் தந்தை அளித்த புகாரின் அடிப்படையில், காவல்துறையினர் வழக்குப் பதிவு செய்து தலைமறைவாக உள்ள சமையல்காரரைத் தீவிரமாகத் தேடி வருகின்றனர். 

ஒரு ரசகுல்லாவுக்காகச் சிறுவன் மீது நிகழ்த்தப்பட்ட இந்த மனிதாபிமானமற்ற வன்முறைச் செயல் அப்பகுதி மக்களிடையே பெரும் அதிர்ச்சியை ஏற்படுத்தியுள்ளது.

திருமண விழாவிற்கு வந்திருந்த விருந்தினர்கள் முன்னிலையிலேயே இந்தச் சம்பவம் நிகழ்ந்ததால், அங்கு சிறிது நேரம் பதற்றமான சூழல் நிலவியது. குற்றவாளி விரைவில் கைது செய்யப்படுவார் எனத் தெரிவித்த காவல்துறை, திருமண வீடியோ பதிவுகளைக் கொண்டு விசாரணையை முடுக்கிவிட்டுள்ளது.

-கிரித்திக்கா