அழுத்தமின்றி விளையாடுங்கள், வெற்றியை வசப்படுத்துங்கள்: வீராங்கனைகளுக்கு எம். தீனா உத்வேகம்

கோலாலம்பூர்: 

'ஒரு கை தட்டின் ஓசை எழாது'.

அதுபோல 2026ஆம் ஆண்டு நடைபெறவுள்ள உபர் கோப்பைப் போட்டியை முன்னிட்டு, நாட்டின் மகளிர் பூப்பந்து அணியானது ஒருவருக்கொருவர் ஆதரிக்கும் மனப்பான்மையோடு வலுவான அடித்தளமாக திகழ்கிறது என எம். தீனா வலியுறுத்தியுள்ளார்.

சர்வதேச அரங்கில் அணி மேலும் உறுதியுடனும் ஒற்றுமையுடனும் செயல்பட, இந்த அணுகுமுறை மிக முக்கியமானதாகும் என்றும் அவர் தெரிவித்துள்ளார்.

தனது சக வீரர்களிடையே அழுத்தமில்லாத சூழலை உருவாக்குவதன் முக்கியத்துவத்தையும், தனிப்பட்ட செயல்திறன், அணியின் கூட்டுப் பலத்தில் கவனம் செலுத்துவதன் முக்கியத்துவத்தையும் நாட்டின் முதன்மை மகளிர் இரட்டையர் வீராங்கனை வலியுறுத்தினார்.

"நாங்கள் யாருக்கும் அழுத்தம் கொடுக்க விரும்பவில்லை. ஆட்டத்தை ரசிப்பதும், ஒவ்வொரு போட்டியிலும் சிறந்ததை வழங்குவதுமாகும். சக வீரர்கள் என்ற முறையில், நாங்கள் எப்போதும் ஒருவருக்கொருவர் ஆதரவாக இருக்கிறோம்" என்றார் அவர்.

அதே நேரத்தில், பெர்லி தானுடனான தனது இணைப்பில் அணிக்காக புள்ளிகளைப் பெறுவதற்கான பெரும் பொறுப்பு இருந்தபோதிலும், மலேசியாவைப் பிரதிநிதித்துவப்படுத்தும் ஒவ்வொரு வாய்ப்பையும் அவர் ஒரு சுமையாக அல்ல, மாறாக ஒரு சலுகையாகக் கருதுவதாகக் கூறினார்.

உபர் கோப்பை போன்ற மதிப்புமிக்க அணிப் போட்டிகளில் விளையாடுவதற்கு வழங்கப்பட்ட நம்பிக்கையை முழுமையாகப் பாராட்ட வேண்டும் என்றும், இது ஒவ்வொரு வீரரையும் களத்தில் சிறந்த செயல்திறனை வெளிப்படுத்தத் தூண்டும் என்றும் தீனா தெரிவித்தார்.

"மலேசியாவுக்காக விளையாடுவதும், களத்தில் இருப்பதும் நன்றியுடன் இருக்க வேண்டிய ஒரு விஷயம். எனவே, நாங்கள் எங்களால் முடிந்த சிறந்ததைச் செய்வோம்" என்று சமீபத்தில் சந்தித்தபோது அவர் கூறினார்.

அணியின் தயார்நிலை குறித்து கருத்து தெரிவித்த தீனா, மலேசிய பூப்பந்து சங்கத்தால் ஏற்பாடு செய்யப்பட்ட டென்மார்க்கின் ஹெர்னிங்கில் நடைபெற்ற மையப் பயிற்சி முகாமை, அணியின் பொருந்தக்கூடிய தன்மையை வலுப்படுத்துவதற்கான ஒரு மூலோபாய நடவடிக்கையாகக் கருதுவதாகத் தெரிவித்தார்.

எட்டு நாள் பயிற்சிக் காலம், தொழில்நுட்ப அம்சங்களை மேம்படுத்துவதற்கான வாய்ப்பை வழங்குவதோடு மட்டுமல்லாமல், வீரர்களிடையே 'அணி ஒருங்கிணைப்பை' உருவாக்குவதற்கான ஒரு முக்கிய தளமாகவும் இருந்ததாக அவர் கூறினார்.

-சங்கீர்த்தனா