இந்தோனேசிய அதிபரை விரைவில் சந்திக்கும் பிரதமர் அன்வார்

கோலாலம்பூர்:

மலேசியப் பிரதமர் டத்தோ ஸ்ரீ அன்வார் இப்ராஹிம், இந்தோனேசிய அதிபர் பிரபோவோ சுபியாண்டோ ஆகியோர் இருதரப்பு உறவுகளை வலுப்படுத்துவதற்காக விரைவில் ஜகார்த்தாவில் நேரில் சந்திக்க உள்ளனர். 

அண்மையில் தொலைபேசி வாயிலாக உரையாடிய இரு தலைவர்களும், ஈரான்-இஸ்ரேல் மோதல் உள்ளிட்ட தற்போதைய சர்வதேசச் சிக்கல்கள் குறித்துத் தங்கள் கருத்துகளைப் பகிர்ந்து கொண்டனர். இந்தச் சந்திப்பு இரு நாடுகளுக்கும் இடையிலான நீண்டகால நட்புறவை மேலும் உறுதிப்படுத்தும் ஒரு முக்கிய நடவடிக்கையாகக் கருதப்படுகிறது.

இந்த உரையாடலின் போது, மேற்காசியாவில் நிலவும் பதற்றத்தைத் தணிக்கவும், அமைதியை நிலைநாட்டவும் ராஜதந்திர ரீதியிலான முயற்சிகளைத் தொடர வேண்டியதன் அவசியத்தை இரு தலைவர்களும் வலியுறுத்தினர். 

குறிப்பாக, அமெரிக்கா, ஈரானுடன் நேரடித் தொடர்புகொண்டு போரை உடனடியாக நிறுத்த அதிபர் பிரபோவோ மேற்கொண்டு வரும் முயற்சிகளுக்குப் பிரதமர் அன்வார் தனது முழு ஆதரவைத் தெரிவித்துள்ளார். 

அமைதியான, நிலையான தீர்வை நோக்கிப் பேச்சுவார்த்தைக்கான வாய்ப்புகளை உருவாக்குவதே இந்த  நடவடிக்கையின் முக்கிய நோக்கமாகும்.

கடந்த ஆண்டு ஜூலை மாதம் நடைபெற்ற 13-வது ஆண்டுக்கால ஆலோசனைக் கூட்டத்திற்குப் பிறகு, இரு தலைவர்களுக்கும் இடையிலான உயர்மட்ட சந்திப்பாக இது அமையவுள்ளது. 

மலேசியா-இந்தோனேசியா இடையிலான கூட்டாண்மையை மேம்படுத்துவதற்கான வழிமுறையாக இந்த ஆலோசனைகள் கருதப்படுகின்றன. பொதுமக்களின் உயிர்களைப் பாதுகாப்பதற்கும், பிராந்திய அமைதியை உறுதிப்படுத்துவதற்கும் இந்தச் சந்திப்பு மிக அவசியமான ஒன்றாகப் பார்க்கப்படுகிறது.

-கிரித்திக்கா