மறுசுழற்சி பொருட்களைச் சேகரித்துத் தன் பார்வையை மீட்டெடுத்த முதியவர்

நீலாய்:

நெகிரி செம்பிலான் மாநிலம், நீலாய் பகுதியைச் சேர்ந்த 74 வயது முதியவர் ஜாஃபர் இத்ருஸ், குப்பைகளை முறையாகச் சேகரித்து மறுசுழற்சி செய்ததன் மூலம் தனது இடது கண் அறுவை சிகிச்சைக்கான நிதியைத் திரட்டிப் பலரது பாராட்டுகளைப் பெற்றுள்ளார். 

கடந்த 2021-ஆம் ஆண்டு முதல் 'KitaRecycle' எனும் திட்டத்தில் இணைந்து செயல்பட்டு வரும் இவர், இதுவரை சுமார் 8,000 மலேசிய ரிங்கிட் மதிப்பிலான வெகுமதிப் புள்ளிகளை ஈட்டியுள்ளார்.

ஓய்வுபெற்ற அரசு ஊழியரான இவருக்கு, சில ஆண்டுகளுக்கு முன்பு கண்ணில் கண்புரை (Cataract) பாதிப்பு ஏற்பட்டது. இரவு நேரங்களில் வாகனம் ஓட்ட முடியாத அளவிற்குப் பார்வை மங்கியதால், மருத்துவர்கள் அவருக்கு உடனடி அறுவை சிகிச்சை செய்யப் பரிந்துரைத்தனர். 

கடந்த ஜனவரி மாதம் புத்ரா மலேசியப் பல்கலைக்கழக மருத்துவமனையில் இவருக்கு அறுவை சிகிச்சை நடைபெற்றது. இதற்கான சுமார் 1,300 ரிங்கிட் செலவை, தனது சேமிப்புப் பணத்திலிருந்து எடுக்காமல், மறுசுழற்சி மூலம் கிடைத்த வருமானத்தைக் கொண்டே அவர் ஈடுகட்டியுள்ளார்.

தனது குடியிருப்புப் பகுதி, சாலையோரங்களில் வீசப்படும் பிளாஸ்டிக் பாட்டில்கள், அட்டைப் பெட்டிகள் போன்றவற்றைச் சேகரித்து வரும் இவர், சுற்றுச்சூழல் பாதுகாப்பில் இளைய தலைமுறையினருக்கும் முன்மாதிரியாகத் திகழ்கிறார். 

"குப்பைகளைச் சேகரித்ததன் மூலம் கிடைத்த வருமானத்தில் எனது பார்வையை மீட்டெடுத்தது மிகுந்த மனநிறைவைத் தருகிறது" என்று அவர் மகிழ்ச்சியுடன் தெரிவித்துள்ளார். பல மறுசுழற்சிப் போட்டிகளில் விருதுகளை வென்றுள்ள இவர், பொதுமக்களும் கழிவு மேலாண்மையில் ஆர்வம் காட்ட வேண்டும் என்று கேட்டுக்கொண்டுள்ளார்.

-கிரித்திக்கா