தமிழகத்தில் சோப்பு, டிடர்ஜென்ட் விலை அதிகரிப்பு: சிறு தொழில் உற்பத்தியாளர்கள் சங்கம் அறிவிப்பு

சென்னை: 

தமிழகத்தில் துணி துவைக்கும் சோப்பு, லிக்விட், வாஷிங் பவுடர் ஆகியவற்றின் விலை உயருவதாகத் தமிழ்நாடு சிறு தொழில் சோப்பு, டிடர்ஜென்ட் உற்பத்தியாளர்கள் சங்கம் அறிவித்துள்ளது. 

நடுத்தர மக்களின் அன்றாடத் தேவைகளில் ஒன்றான இவற்றின் விலை உயர்வு பொதுமக்களிடையே கவலையை ஏற்படுத்தியுள்ளது.

இந்த விலை உயர்விற்கான முக்கிய காரணமாக, சோப்பு, டிடர்ஜென்ட் தயாரிக்கப் பயன்படும் மூலப்பொருட்களின் விலை கடுமையாக உயர்ந்துள்ளதை உற்பத்தியாளர்கள் சுட்டிக்காட்டியுள்ளனர். 

குறிப்பாக, கடந்த சில மாதங்களாக சர்வதேசச் சந்தையில் ஏற்பட்டுள்ள மாற்றங்கள், போக்குவரத்துச் செலவு அதிகரிப்பு போன்றவை உற்பத்திச் செலவை வெகுவாக உயர்த்தியுள்ளதாகக் கூறப்படுகிறது.

இழப்புகளைத் தவிர்க்கவும், உற்பத்தித் தொழிலைத் தொடர்ந்து நடத்தவும் வேறு வழியின்றி இந்த விலை உயர்வை அமல்படுத்த வேண்டிய கட்டாயம் ஏற்பட்டுள்ளதாகச் சங்கம் விளக்கமளித்துள்ளது. 

இதன் காரணமாக, சந்தையில் உள்ள பல்வேறு முன்னணி, உள்ளூர் பிராண்டுகளின் சோப்பு கட்டிகள், திரவங்கள், துவைக்கும் பொடிகளின் விலை விரைவில் அதிகரிக்கவுள்ளது.

ஏற்கனவே அத்தியாவசியப் பொருட்களின் விலை உயர்வால் மக்கள் திணறி வரும் நிலையில், இந்தப் பொருட்களின் இந்த விலை உயர்வு குடும்ப சுமையை மேலும் அதிகரிக்கும் என எதிர்பார்க்கப்படுகிறது.

-கிரித்திக்கா