ஜெர்மனி தேசிய அணிக்கு புதிய பயிற்சியாளராக க்ளோப்பா?: எதிர்பார்ப்பு அதிகரிப்பு

பெர்லின்: 

முன்னாள் லிவர்பூல் பயிற்சியாளர் ஜூர்கன் க்ளோப், வரும் கோடைகாலத்தில் ஜெர்மனி தேசிய கால்பந்து அணியின் புதிய பயிற்சியாளராக பொறுப்பேற்கலாம் என்ற தகவல் வெளியாகியுள்ளது.

தற்போது அவர் ரெட் புல் அமைப்பில் உலகளாவிய கால்பந்து பொறுப்பாளராக பணியாற்றி வருகிறார். எனினும், முக்கிய போட்டிகளைப் பார்ப்பதற்குப் பதிலாக வேறு நிகழ்ச்சிகளில் அவர் பங்கேற்றது அவரது எதிர்காலம் குறித்து அமைப்பின் உள்ளகத்தில் கேள்விகளை எழுப்பியுள்ளது.

2024-ஆம் ஆண்டு லிவர்பூலை விட்டு விலகிய 58 வயதான க்ளோப், கடந்த ஆண்டு ஜனவரியில் ரெட் புல் அமைப்பில் சேர்ந்தார். ஆனால் அந்த பின்னணி பொறுப்பு அவருக்கு முழுமையாக பொருத்தமாக இல்லை என தகவல்கள் தெரிவிக்கின்றன. களத்தில் நேரடியாக வீரர்களை வழிநடத்தும் பணியில்தான் அவரது திறமை அதிகமாக வெளிப்படும் எனவும் கூறப்படுகிறது.

க்ளோப்பின் முகவர் மார்க் கோசிக்கே, ஜெர்மனி நாட்டுடன் க்ளோப்புக்கு நெருங்கிய தொடர்பு இருப்பதாக தெரிவித்தார். ஒருநாள் அந்த பொறுப்பை ஏற்க வேண்டிய சூழல் ஏற்படலாம் என்றும் அவர் குறிப்பிட்டார்.

ஆனால் இதற்கு ஒரு முக்கிய தடையாக, தற்போதைய ஜெர்மனி பயிற்சியாளர் ஜூலியன் நாகெல்ஸ்மேன் 2028 வரை ஒப்பந்தத்தில் இருப்பது குறிப்பிடப்படுகிறது. 2023 முதல் அணியை வழிநடத்தும் அவர், யூரோ 2024 போட்டியில் ஜெர்மனியை காலிறுதிக்கு கொண்டு சென்றார்.

இதற்கிடையில், க்ளோப் ரெட் புல் அமைப்புடன் 2029 வரை ஒப்பந்தத்தில் இருந்தாலும், அந்த ஒப்பந்தத்தை நீட்டிப்பது குறித்தும் ஆரம்ப நிலை பேச்சுவார்த்தைகள் நடந்துள்ளதாக தகவல்கள் தெரிவிக்கின்றன.

-கிரித்திக்கா