அந்நியத் தொழிலாளர்கள் விவகாரம்; தொழிலாளர் சட்டங்களை மீறுவதற்கு அரசாங்கம் முதலாளிகளை அனுமதிக்காது: டத்தோஸ்ரீ ரமணன்

கோலாலம்பூர்:

அந்நியத் தொழிலாளர்களை வேலைக்கு அமர்த்துவதன் மூலம் தொழிலாளர் சட்டங்களை மீறுவதற்கு அரசாங்கம் முதலாளிகளை அனுமதிக்காது.

மனிதவள அமைச்சர் டத்தோஸ்ரீ ரமணன் ராமகிருஷ்ணன் இதனை கூறினார்.

தொழிலாளர் சட்டங்களை மீறியதாகவோ, நீதிமன்ற உத்தரவுகளை மீறுவதாகவோ அல்லது கட்டாய உழைப்பு தொடர்பான குற்றங்களுக்காக தண்டனை பெற்றதாகவோ பதிவு செய்யப்பட்ட எந்தவொரு முதலாளியும் அந்நியத் தொழிலாளர்களை வேலைக்கு அமர்த்த அனுமதிக்கப்பட மாட்டார்கள்.

இது தொடர்பில் மனிதவள அமைச்சு கடுமையான எச்சரிக்கையை விடுக்கிறது.

புலம்பெயர்ந்த தொழிலாளர்கள் போன்ற பாதிக்கப்படக்கூடிய குழுக்களுக்கு எதிரான எந்தவொரு ஒடுக்குமுறையையும், குறிப்பாக முதலாளிகளால் கடப்பிதழ்களை நிறுத்தி வைப்பது, செலுத்தப்படாத ஊதியம் தொடர்பானவர்களுக்கு எதிரான எந்தவொரு ஒடுக்குமுறையையும் அரசாங்கம் தீவிரமாகக் கருதுகிறது.

இந்த நடைமுறையை ஒழிக்க, அந்நியத் தொழிலாளர்களின் பாதுகாப்பு வலுப்படுத்தப்படுவதை உறுதிசெய்ய அமைச்சு முன்னெச்சரிக்கை நடவடிக்கைகளை எடுத்து வருகிறது.

இது சம்பந்தமாக, அரசாங்கம் வேலைவாய்ப்புச் சட்டம் 1955 (சட்டம் 265) இன் பிரிவு 60கே இன் கீழ் கடுமையான வேலைவாய்ப்பு ஒப்புதல் தேவைகளை விதிக்கிறது.

இதில் சட்டத்தின் விதிகளை மீறும் முதலாளிகள் மீது வழக்குத் தொடரப்படும்.

கூடுதலாக, மனிதவளத் துறையின் கவனம் செலுத்தும் ஆய்வுகள், கண்காணிப்பு, கடுமையான நடவடிக்கை மூலம் சட்ட அமலாக்கத்தை அரசாங்கம் வலுப்படுத்துகிறது என்று அவர் நாடாளுமன்ற வலைத்தளத்தில் எழுத்துப்பூர்வமாக அளித்த பதிலில் கூறினார்.

புலம்பெயர்ந்த அந்நியத் தொழிலாளர்களை துஷ்பிரயோகம் செய்வதை ஒழிக்க அமைச்சால் எடுக்கப்பட்டு வரும் மேற்கொள்ளப்படும் தற்போதைய நடவடிக்கைகள், குறிப்பாக முதலாளிகளால் பாஸ்போர்ட் அல்லது அடையாள ஆவணங்களை நிறுத்தி வைப்பது, அத்துடன் செலுத்தப்படாத ஊதியம், இந்த நடவடிக்கைகளின் செயல்திறன் நிலை தொடர்பானவை குறித்து செலாயாங் நாடாளுமன்ற உறுப்பினர் வில்லியம் லியோங்கின் கேள்விக்கு டத்தோஸ்ரீ ரமணன் இவ்வாறு பதிலளித்தார்.

குறிப்பாக அந்நியத்  தொழிலாளர்கள் மின்-புகார் மூலம் தொடர்ந்து புகார் அளிக்கலாம் என்றார் அவர்.

- பார்த்திபன் நாகராஜன்