இந்திய சமுதாயத்திற்கான மித்ராவின் இலக்கு மாறவில்லை: டத்தோஸ்ரீ ரமணன்

கோலாலம்பூர்:

இந்திய சமுதாயத்திற்கான மித்ராவின் இலக்கு ஒருபோதும் மாறவில்லை.

தொழில் முனைவோர் மேம்பாடு கூட்டுறவு துணையமைச்சர் டத்தோஸ்ரீ ரமணன் ராமகிருஷ்ணன் இதனை கூறினார்.

மித்ரா ஒரு மூலோபாய தலையீட்டு அணுகுமுறை மூலம் இந்திய சமூகத்தின் சமூக, பொருளாதார வளர்ச்சிக்கு நேரடியாகப் பொறுப்பான நிறுவனமாகத் தொடர்ந்து செயல்படுகிறது.

மித்ரா ஒதுக்கீடுகளை மற்ற செயல்படுத்தும் நிறுவனங்களுக்கு வழங்குவது பணிக் குழுவின் செயல்பாடுகள் அல்ல.

மாறாக பிரதமர் டத்தோஸ்ரீ அன்வார் இப்ராஹிம் ஒப்புதல் அளித்த பல்வேறு நிறுவனங்களுக்கு இடையேயான ஒத்துழைப்புக்கான ஒரு வழிமுறையாகும்.

பிரதமரால் அங்கீகரிக்கப்பட்ட இந்த முன்முயற்சித் திட்டங்கள் தலையீட்டுத் தன்மை கொண்டது.

இது இந்திய சமூகத்திற்கான கல்வி, நலன், ஆன்மீகம், அடிப்படை வசதிகளை மேம்படுத்துதல் உள்ளிட்ட முக்கியப் பிரச்சினைகளைத் தீர்ப்பதையும், அமைச்சுகளுக்கு இடையேயான நடவடிக்கைகளைத் தேவைப்படுத்துவதையும் நோக்கமாகக் கொண்டுள்ளது.

இன்று மக்களவையில் நடைபெற்ற விநியோக மசோதா 2026 மீதான விவாதத்தை நிறைவு செய்தபோது அவர் இவ்வாறு கூறினார்.

மித்ரா ஒதுக்கீடுகள் குறிப்பிட்ட அமைப்புகள் அல்லது தனிநபர்களுக்கு அல்ல.

மாறாக இந்திய சமூகத்தை முழுமையாகச் சென்றடைவதை உறுதி செய்வதற்காக பிரதமரின் முயற்சியே இந்தத் திட்டத்தை செயல்படுத்துகிறது.

எனவே, மித்ரா ஒதுக்கீட்டில் 100 சதவீதம் இந்திய சமூகத்தின் நலனுக்காக மட்டுமே பயன்படுத்தப்படுகிறது என்பதை நான் வலியுறுத்த விரும்புகிறேன்.

இந்திய சமூகத்தை ஈடுபடுத்தாத பிற அமைச்சின் திட்டங்களுக்கு ஒரு சதவீதம் கூட பயன்படுத்தப்படுவதில்லை.

ஒவ்வொரு ரிங்கிட்டும் மித்ரா ஒதுக்கீடாகவே உள்ளது.

மேலும் ஒவ்வொரு உதவி பெறுநரும் அரசாங்கத்தால் நிர்ணயிக்கப்பட்ட இலக்கிற்கு ஏற்ப இந்திய சமூகத்தைச் சேர்ந்தவர்கள் என்று டத்தோஸ்ரீ ரமணன் கூறினார்.

- பார்த்திபன் நாகராஜன்