மலேசியாவில் தொழிற்சாலையைத் திறக்க டெஸ்லா ஒருபோதும் உறுதியளிக்கவில்லை: தெங்கு ஸப்ரூல்

புத்ராஜெயா:

மலேசியாவில் ஒரு தொழிற்சாலையைத் திறப்பதற்கு டெஸ்லா நிறுவனம் ஒருபோதும் உறுதியளிக்கவில்லை.

முதலீடு, வர்த்தகம், தொழில்துறை அமைச்சர் டத்தோஸ்ரீ தெங்கு ஸப்ரூல் தெங்கு அப்துல் அஜிஸ் இதனை கூறினார்.

அமைச்சு டெஸ்லாவின் நிறுவனர் எலான் மஸ்குடன் முதலீட்டை ஈர்க்கும் முயற்சியில் பல முறை  விவாதித்தது.

ஆனால் அதில் இந்த தொழிற்சாலை விவாகாரம் இல்லை என்று அவர் விளக்கினார்.

வெளிநாட்டுச் செய்திகள் டெஸ்லாவின் அதிகாரப்பூர்வ அறிக்கை அல்ல. மாறாக யூகங்கள் அல்லது பெயரிடப்படாத ஆதாரத்தை மட்டுமே மேற்கோள் காட்டுகிறது. 

இந்த செய்தியின் ஆதாரம் டெஸ்லா அல்ல என்பதால், இந்த செய்தியின் செல்லுபடியை பத்திரிக்கையாளர்கள் டெஸ்லாவுடன் சரிபார்க்க வேண்டும் என்று அவர் கூறினார்.

முன்னதாக மலேசியா, தாய்லாந்து, இந்தோனேசியாவில் தொழிற்சாலைகளை அமைக்கும் திட்டத்தை டெஸ்லா ரத்து செய்தது என செய்திகள் வெளியாகியது என்பது குறிப்பிடத்தக்கது.

- பார்த்திபன் நாகராஜன்