இந்திய வெங்காயம் விலை 100% உயர்வு: 5 ரிங்கிட்டிற்கு விற்கப்பட்ட வெங்காயம் இன்று 9 ரிங்கிட்

பினாங்கு: 

பினாங்கு சந்தையில் விற்கப்படும் வெங்காயத்தின் விலை மிக வேகமாக அதிகரித்து வருவது கவலை தருவதாக உள்ளது பினாங்கு பயனீட்டாளர் சங்கத் தலைவர் மொஹைதீன் அப்துல் காதர் வருத்தம் தெரிவித்துள்ளார்.

இந்தியாவிலிருந்து இறக்குமதி செய்யப்படும் வெங்காயத்தின் விலை ஒரு கிலோவுக்கு மவெ 9.00 ஆக உயர்ந்துள்ளதாக பினாங்கில் மேற்கொள்ளப்பட்ட சந்தை ஆய்வு தெளிவுபடுத்தியிருப்பதாக அச் சங்கத்தின் தலைவர் முஹைதீன் அப்துல் காதர் கூறினார்.

கிறிஸ்துமஸ் பண்டிகையின் போது, ​​வெங்காயத்தின் விலை கிலோ ஒன்றுக்கு மவெ 5.00 என கட்டுப்படுத்தப்பட்டது.

சுமார் இரண்டு வாரங்களில் அது கிட்டத்தட்ட 100% அதிகரித்துள்ளது என்றார் அவர்.

இந்தியாவிலிருந்து இறக்குமதி நிறுத்தப்பட்டதால் பிரச்னை தொடங்கியதாக மொத்த வியாபாரிகள் கூறுகின்றனர். 

இறக்குமதி செய்யப்பட்ட 10 கிலோ வெங்காய மூட்டையில் இருந்து 60% மட்டுமே விற்பனை செய்ய முடியும் என்றும் மற்ற 40% சேதமடைந்து அழுகியதாக இருப்பதாக சில்லறை வியாபாரிகள் தெரிவித்துள்ளனர்.

ஆனால், வியாபாரிகள் 10 கிலோவிற்கான விலையில் வெங்காயத்தை வாங்குகின்றனர். இதில் மொத்த வியாபாரிகள்தான் லாபம் அடைகின்றனர் என்றார் முகைதீன்.

வெங்காயத்தின் அபரிமிதமான விலையேற்றம் குறித்து உடனடி விசாரணையை மேற்கொள்ள விவசாய இலாகா, உள்நாட்டு வர்த்தகம் மற்றும் வாழ்க்கைச் செலவு அமைச்சை பினாங்கு பயனீட்டாளர் சங்கம் கேட்டுக்கொள்கிறது.
 
இந்த உயர்வு நியாயமானதா? வெங்காயத்தின் தரத்தை சரிபார்க்க வேண்டும் என நாங்கள் கோரிக்கை விடுக்க விரும்புகின்றோம் என்றார் முஹைதீன்.

இதனால் இந்திய வெங்காயம் தொடர்பு உடைய உணவுகளின் விலைகள்கூட அதிகரிக்க வாய்ப்பு இருப்பதாக முஹைதீன் அப்துல் காதர் சுட்டிக் காட்டினார்.

- ஃபிதா