கிள்ளான் லிட்டில் இந்தியாவில் தீபாவளி சந்தை: 130க்கும் மேற்பட்ட கடைகள் பதிவு செய்யப்பட்டன 

கிள்ளான்: 

கிள்ளான் லிட்டில் இந்தியா பகுதியில் தீபாவளி பண்டிகையை முன்னிட்டு 130-க்கும் மேற்பட்ட வர்த்தகர்கள் தீபாவளி சந்தைக்கான பதிவை அதிகாரப்பூர்வமாக மேற்கொண்டுள்ளனர்.

LORONG TINGKAT மற்றும் JALAN TENGKU KELANA ஆகிய பகுதிகளில் இந்த வண்ணமயமான கலாச்சாரச் சந்தை கோலாகலமாக நடைபெற உள்ளது.

கிள்ளான் அரச நகரமன்றத்தின் உரிமத்துறை இயக்குநர் முகமது இசாத் மொக்தார்,  142 வர்த்தக இடங்களை வழங்கியதாகவும் அதில் 132 இடங்களுக்குப் பதிவு செய்யப்பட்டுள்ளதாகவும் தெரிவித்தார்.

இந்த இரு வார காலச் சந்தையானது அக்டோபர் 25 முதல் நவம்பர் 7 ஆம் தேதி வரை பொதுமக்களுக்காக இயங்கவுள்ளது என்று அவர் சொன்னார். 

பதிவு செய்துள்ள வர்த்தகர்களில் 74 பேர் பண்டிகை தேவைகளுக்கான பொருட்களையும், 20 பேர் பட்டாசுகளையும் விற்பனை செய்யவுள்ளனர். மேலும், 19 பேர் பலூன்கள் மற்றும் மருதாணி வரையும் தொழிலிலும் ஈடுபடவுள்ளதாகத் தெரிவிக்கப்பட்டுள்ளது.

ஜாலான் தெங்கு கெலானா வணிகப் பகுதிக்கு அருகில் அமைந்துள்ள இந்த இடம், வெளியூர் கூட்டத்தை ஈர்க்கும் வகையில் மிகச் சிறப்பாக ஏற்பாடு செய்யப்பட்டுள்ளது. பெரும்பாலான விண்ணப்பதாரர்கள் 45 வயதுக்குட்பட்ட இளைஞர்கள் என்பது குறிப்பிடத்தக்கது.

ஜாலான் தெங்கு கெலானா மற்றும் லோரோங் திங்காட் பகுதி கடை உரிமையாளர்கள் தங்கள் பொருட்களை ஐந்து அடி நடைபாதையில் காட்சிப்படுத்தலாம். இதற்கு நகராட்சியின் அனுமதியுடன் தினமும் ரிம 10 கட்டணமாகச் செலுத்த வேண்டும் என்று தெரிவிக்கப்பட்டுள்ளது.

-மவித்திரன்