மில்லியன் கணக்கான டாலர்கள் மதிப்புள்ள கலைப் படைப்பான வாழைப்பழம் பிரெஞ்சு அருங்காட்சியகத்தில் இருந்து திருடப்பட்டது

ஸ்ட்ராஸ்பேர்க்:

கிழக்கு பிரான்சில் உள்ள ஒரு அருங்காட்சியகம், இத்தாலிய காட்சி கலைஞர் மொரிசியோ கட்டெலனின் மில்லியன் கணக்கான டாலர்கள் மதிப்புள்ள கலைப் படைப்பின் முக்கிய கூறான ஒரு வாழைப்பழத்தைக் காணவில்லை என்று நேற்று போலிஸாரிடம் புகார் அளித்துள்ளது.

கட்டெலனின் 'காமெடியன்' (நகைச்சுவை நடிகர்) என்ற தலைப்பிலான தூண்டுதல் படைப்பின் ஒரு பகுதியாக, பிசின் டேப்பைப் பயன்படுத்தி சுவரில் ஒட்டப்பட்டிருந்த அந்த வாழைப்பழம், நேற்று முன்தினம் ஒரு காவலாளியால் காணாமல் போனதாகக் கண்டறியப்பட்டது.

பாரிஸில் உள்ள புகழ்பெற்ற பொம்பிடோ மையத்தின் ஒரு கிளையான பொம்பிடோ-மெட்ஸ் அருங்காட்சியகம், அறியப்படாத நபர் ஒருவரால் நிகழ்த்தப்பட்ட திருட்டு குறித்து ஒரு குற்றப் புகாரைப் பதிவு செய்ததாக ஒரு அறிக்கையில் தெரிவித்துள்ளது.

அந்த வாழைப்பழம் மாற்றப்பட்டுவிட்டதாகவும் அந்த அருங்காட்சியகம் தெரிவித்துள்ளது.

கருத்தியல் கலைப் படைப்பு சேதமடைவது இது முதல் முறையல்ல. அதன் முக்கிய உறுப்பான வாழைப்பழம் எளிதில் அழியக்கூடியது என்பதால், அந்தப் படைப்பு பொருத்தமானதாக இருப்பதை உறுதி செய்வதற்காக, ஒவ்வொரு மூன்று நாட்களுக்கும் அது மாற்றப்படும்.

கடந்த ஆண்டு ஜூலை மாதம், அருங்காட்சியகப் பார்வையாளர் ஒருவர் அந்த வாழைப்பழத்தைச் சாப்பிட்டார். இருப்பினும், காவலாளிகள் உடனடியாக தலையிட்டு, அதை ஒரு புதிய வாழைப்பழத்துடன் மாற்றினர்.

அந்தச் சம்பவத்தில் சட்ட நடவடிக்கை எடுக்க வேண்டாம் என்று அருங்காட்சியகம் முடிவு செய்தது.

இருப்பினும், இந்த முறை, குற்றவாளி அடையாளம் காணப்படாததால் ஒரு குற்றப் புகாரைப் பதிவு செய்ய அருங்காட்சியகம் முடிவு செய்தது.

இதுபோன்ற இரண்டாவது சம்பவம் இது என்பதையும், அந்தக் கலைப் படைப்பிற்கான மரியாதை பற்றிய பிரச்சினையாகவே அது கருதப்படுவதையும் அந்த அருங்காட்சியகம் மேலும் தெரிவித்துள்ளது.

கலையின் கருத்து, அதன் மதிப்பைக் கேள்விக்குட்படுத்துவதை நோக்கமாகக் கொண்ட அந்த உண்ணக்கூடிய படைப்பு, 2019 ஆம் ஆண்டு மியாமி கடற்கரையில் நடைபெற்ற ஆர்ட் பேசல் கண்காட்சியில் அறிமுகப்படுத்தப்பட்டதிலிருந்து, AS$120,000 (சுமார்  510,000 ரிங்கிட்) என்ற கோரும் விலையுடன், சர்ச்சையைத் தூண்டியது.

இருப்பினும், அந்தப் படைப்பின் மதிப்பு தொடர்ந்து உயர்ந்தது. சீனாவில் பிறந்த கிரிப்டோ நிறுவனர் ஜஸ்டின் சன், 2024 ஆம் ஆண்டில், AS$5.2 மில்லியன் (சுமார் 22 மில்லியன் ரிங்கிட்) மதிப்பில் அந்தப் படைப்பின் ஒரு பதிப்பை வாங்கினார் என்பது குறிப்பிடத்தக்கது.

-சங்கீர்த்தனா